‘फोडाफोडीचे राजकारण मला कधी मान्य झाले नाही, मात्र उद्धव ठाकरे यांनी मनसेचे सहा नगरसेवक ‘खोके’ देऊन फोडले, तेव्हा त्यांना काही वाटले नाही. यांच्यासोबत आता शरद पवार बसले आहेत. राज्यात या फोडाफोडीच्या राजकारणाची सुरुवात पवार यांनीच केली. काँग्रेस फोडून त्यांनीच पहिल्यांदा ‘पुलोद’चा प्रयोग केला,’ अशी टीका मनसेचे अध्यक्ष राज ठाकरे यांनी रविवारी केली.
महायुतीचे कल्याण लोकसभेचे उमेदवार डॉ. श्रीकांत शिंदे आणि ठाणे लोकसभेचे उमेदवार नरेश म्हस्के यांच्या प्रचारार्थ आयोजित कळवा येथील सभेतून राज यांनी शरद पवार यांच्यासह उद्धव ठाकरे यांच्यावरही टीकास्त्र डागले. ‘छगन भुजबळ यांच्यासह शिवसेना आमदार फोडण्याचे काम पवार यांनी केले. त्यानंतर नारायण राणे यांच्यासोबत आमदार घेऊन काँग्रेसने शिवसेना फोडली. आज शिवसेना फुटल्यानंतर ‘माझा बाप चोरला, माझा बाप चोरला’, असे उद्धव सांगतात. जर तुम्हाला तुमच्या वडिलांबद्दल एवढेच प्रेम होते तर शिवसेनाप्रमुख बाळासाहेब ठाकरेंवर टीका करणाऱ्या सुषमा अंधारे यांना पक्षाचे प्रवक्तेपद कसे दिले,’ असा प्रश्न राज यांनी केला.
पंतप्रधान नरेंद्र मोदी यांना बिनशर्त पाठिंबा जाहीर केल्यानंतर राज यांनी प्रथमच शिवसेनेच्या व्यासपीठावरून ठाण्यात भाषण केले. ‘ज्या भुजबळांनी बाळासाहेबांच्या अटकेची तयारी केली होती, त्यांच्याबरोबर मंत्रिमंडळात मांडीला मांडी लावून का बसलात, तेव्हा लाज वाटत नाही. माझ्या वडिलांना अटक करणाऱ्या या माणसाबरोबर मी बसणार नाही, अशी भूमिका का नाही घेतली,’ असा प्रश्न विचारून राज यांनी उद्धव यांना लक्ष्य केले. याप्रसंगी ठाण्याचे पालकमंत्री शंभुराज देसाई, आमदार प्रताप सरनाईक, भरत गोगावले, संजय केळकर, राजू पाटील, माजी आमदार, रवींद्र फाटक, मनसे नेते अमित ठाकरे, बाळा नांदगावकर, अभिजित पानसे, राष्ट्रवादी काँग्रेसचे ठाणे जिल्हाध्यक्ष आनंद परांजपे उपस्थित होते.
‘निवडणूक लढविण्याच्या वलग्ना’
काही लोक ठाणे, कल्याणमधून निवडणूक लढण्याच्या वलग्ना करत होते; पण वेळ आली तेव्हा पळून गेले. ‘तूम लढो हम कपडा संभालते है’, अशी त्यांची वृत्ती असल्याचा टोला डॉ. श्रीकांत शिंदे यांनी युवासेनाप्रमुख आदित्य ठाकरे यांचे नाव न घेता लगावला. ‘महाविद्यालयीन दशेत राज ठाकरे यांनी माझ्या डोक्यावर हात ठेवला नसता, तर मी आज खासदारकीच्या उमेदवारीच्या योग्यतेचा नसतो,’ असे या वेळी नरेश म्हस्के यांनी सांगितले.
जितेंद्र आव्हाड यांचा टोला
राष्ट्रवादी काँग्रेस शरदचंद्र पवार पक्षाचे आमदार जितेंद्र आव्हाड कळवा-मुंब्रा विधानसभा मतदारसंघाचे प्रतिनिधित्व करतात. हा मतदारसंघ कल्याण लोकसभा मतदारसंघात येत असून, येथील कळवा येथे पारसिकनगर परिसरात असलेल्या ९० फूट रोडवर राज यांची सभा झाली. या सभेनंतर आव्हाड यांनी ‘एक्स’वरून राज यांच्यावर टीका केली. ‘राज ठाकरेंनी एकच फतवा काढावा तो म्हणजे ‘उठ दुपारी, घे सुपारी. तुम्ही घ्या सुपारी, जनता वाजवेल तुतारी’ असा टोला त्यांनी लगावला.
