सोलापूर जिल्ह्याचे पालकमंत्री आणि भाजप नेते चंद्रकांत पाटील यांच्या वक्तव्याने खळबळ उडाली आहे. भारतीय जनता पार्टीसाठी सोलापूर लोकसभेची निवडणूक थोडीशी कठीण आहे, मात्र माढा लोकसभेची निवडणूक जरा जास्तच कठीण असल्याची कबुली खुद्द चंद्रकांत पाटील यांनी दिली आहे. चंद्रकांतदादांच्या खुल्या कबुलीने राज्यात ४५+ घोषणा देणारी भाजप खरोखर अडचणीत असल्याची कुजबूज सुरू झाली आहे.
सोलापूर आणि पुणे जिल्ह्याचे पालकमंत्री चंद्रकांत पाटील यांनी केलेल्या विधानामुळे भाजपच्या गोटात अस्वस्थता पसरली आहे. माढ्यामध्ये धैर्यशील मोहिते पाटील यांच्या उमेदवारीमुळे भाजपची ही जागा अडचणीत असल्याची चर्चा आहे. त्या चर्चेत चंद्रकांत पाटील यांच्या वक्तव्यामुळे भर पडली आहे. मंगळवेढा येथे बुधवारी चंद्रकांत पाटील गाठीभेटी करण्यासाठी आले होते, भाजप आमदार समाधान अवताडे आणि माजी मंत्री लक्ष्मणराव ढोबळे यांनी आयोजित केलेल्या कार्यक्रमात चंद्रकांत पाटील यांनी कार्यकर्त्यांशी बोलताना कामाला लागा अशा सूचना दिल्या आहेत.
महाराष्ट्र राज्यात महायुतीला धक्का नको; कामाला लागा –
महाराष्ट्र राज्यात महायुतीला ४५ पेक्षा एकही जागा कमी मिळणार नाही आणि ज्या तीन जागा अडचणीच्या वाटतात त्यादेखील मिळवायचा प्रयत्न करू असं चंद्रकांत पाटील यांनी सांगितले. तसेच सोलापूरची निवडणूक थोडी कठीण आणि माढा लोकसभेची निवडणूक जास्त कठीण असल्याच चंद्रकांत दादा यांनी सांगितले. शिंदे गट शिवसेनेचे नेते आणि आरोग्य मंत्री तानाजी सावंत यांचे बंधू प्रा.शिवाजी सावंत यांनी मंगळवेढा येथे बुधवारी दुपारी शिवसैनिकांची बैठक घेतली होती. पालकमंत्री चंद्रकांत पाटील बैठकीला संबोधित करताना माढा आणि सोलापूर लोकसभे बाबत महत्वपूर्ण माहिती दिली.
चंद्रकांत पाटील यांची कबुली
सोलापूरची निवडणूक इतकी कठीण नाही असं सांगितलं. माढ्याची निवडणूक या आधी कठीण नव्हती, पण आता ती कठीण झाल्याची कबुली स्वतः चंद्रकांत दादा पाटील यांनी दिली आहे. एका सर्वेमधील झालेल्या अंदाजावर बोलताना चंद्रकांत पाटील यांनी आपलं मत व्यक्त केले. सोलापूरमध्ये भाजपचे राम सातपुते आघाडीवर असल्याचे सांगण्यात आलं असून माढा लोकसभेतून राष्ट्रवादी शरद पवार गटाचे धैर्यशील मोहिते पाटील आघाडीवर असल्याचे दाखवले आहे.
माढ्यामुळे भाजपच्या छातीत धाकधूक वाढली
माढा लोकसभा मतदारसंघात भाजपने रणजितसिंह नाईक निंबाळकर यांना उमेदवारी जाहीर करताच अकलूज येथील मोहिते पाटील कुटुंबाने जाहीर नाराजी व्यक्त करत निंबाळकर याना विरोध केला. भाजप भूमिका बदलत नाही किंवा उमेदवार बदलत नाही, यामुळे मोहिते पाटील परिवारातील विजयसिंह मोहिते पाटील, धैर्यशील मोहिते पाटील यांनी तुतारी हातात घेत भाजपला जबर धक्का दिला. अकलूज मतदार संघातील राजकीय घडामोडीवर खुद्द देवेंद्र फडणवीस यांनी लक्ष ठेवत उत्तम जानकर यांना ऑफर दिली होती. मात्र भाजपचा हा प्लॅन देखील फसला. माढ्याबाबत बोलताना चंद्रकांत पाटील यांच्या वक्तव्याने आणि उत्तम जानकर यांच्या भूमिकेमुळे भाजपमध्ये धाकधूक वाढली आहे.
