सोलापूर : येथील पारशी समाजासाठी आणि संपूर्ण सोलापूर जिल्ह्यासाठी एक अत्यंत अभिमानास्पद आणि ऐतिहासिक क्षण समोर आला आहे. ‘फेडरेशन ऑफ पारसी झोरोस्ट्रियन अंजुमन्स ऑफ इंडिया’ (FPZAI) या राष्ट्रीय संस्थेच्या मुंबईत नुकत्याच पार पडलेल्या वार्षिक सर्वसाधारण सभेत, सोलापूरचे झुबिन अमरिया यांची राष्ट्रीय कार्यकारिणी सदस्य (Executive Committee Member) म्हणून बिनविरोध निवड करण्यात आली आहे. सोलापूर पारशी अंजुमनच्या तब्बल १८० वर्षांच्या इतिहासात हा बहुमान मिळवणारे अमरिया हे पहिलेच सोलापूरकर ठरले आहेत.
त्यांच्या या निवडीमुळे संपूर्ण भारतात सोलापूर पारशी अंजुमनचे नाव उंचावले आहे. झुबिन अमरिया यांच्या प्रदीर्घ अनुभवाचा, दूरदृष्टीचा आणि समाजसेवेच्या ध्यासाचा फायदा फेडरेशनला नक्कीच होईल, तसेच देशभरातील पारशी समाज अधिक मजबूत होईल, असा विश्वास संपूर्ण भारतातील पारशी बांधवांकडून व्यक्त केला जात आहे.
विविध क्षेत्रांत सोलापूरचा झेंडा फडकवणारे झुबिन अमरिया
झुबिन अमरिया यांनी केवळ पारशी समाजातच नव्हे, तर यापूर्वीही विविध राष्ट्रीय आणि राज्यस्तरीय क्षेत्रांत अनेक मानाची पदे भूषवून सोलापूरच्या शिरपेचात मानाचे तुरे रोवले आहेत. त्यांच्या नावावर अनेक ‘पहिले सोलापूरकर’ असे विक्रम नोंदवले गेले आहेत:
फ्री मॅसनरी (Free Masonry): सोलापूरमधील फ्री मॅसनरीच्या १५० वर्षांच्या इतिहासात पहिल्यांदाच सोलापूर जिल्ह्याला सर्वोच्च स्थान मिळाले असून, अमरिया सध्या ‘डिस्ट्रिक्ट ग्रँड लॉज ऑफ इंडिया स्कॉटलंड’ (राष्ट्रीय संस्था) चे डेप्युटी डिस्ट्रिक्ट ग्रँड मास्टर (प्रभारी) म्हणून कार्यरत आहेत.
क्रीडा क्षेत्र: ‘महाराष्ट्र ऑलिम्पिक असोसिएशन’चे (MOA) कार्यकारिणी सदस्य होणारे ते सोलापूरच्या इतिहासातील पहिले व्यक्ती आहेत. तसेच, ‘स्विमिंग असोसिएशन ऑफ महाराष्ट्र’चे मानद सचिवपद भूषवणारेही ते पहिलेच सोलापूरकर ठरले.
रोटरी इंटरनॅशनल: नव्याने विभाजित झालेल्या ‘रोटरी इंटरनॅशनल डिस्ट्रिक्ट ३१३२’ चे पहिले डिस्ट्रिक्ट गव्हर्नर होण्याचा बहुमानही त्यांना मिळाला आहे.
“या पृथ्वीवर राहण्यासाठी मी जे भाडे देतो, ती म्हणजेच माझी समाजसेवा आहे”
या उदात्त भावनेने, कोणत्याही प्रसिद्धीची हाव न धरता झुबिन अमरिया अविरतपणे समाजकार्य करत आहेत. त्यांच्या या नेत्रदीपक यशाबद्दल आणि राष्ट्रीय पातळीवरील निवडीबद्दल संपूर्ण सोलापूरकरांकडून त्यांच्यावर कौतुकाचा आणि अभिनंदनाचा वर्षाव होत आहे.
