बार्शी – अखिल भारतीय औषधी विक्रेता संघटनेने ऑनलाईन औषध विक्री व इंटरनेट फार्मसीविरोधात पुकारलेल्या देशव्यापी बंदला बार्शी शहर व तालुक्यातील औषध विक्रेत्यांनी उत्स्फूर्त प्रतिसाद दिला. बुधवार दि. २० मे २०२६ रोजी बार्शी शहर व तालुक्यातील बहुतांश मेडिकल दुकाने बंद ठेवण्यात आली होती.
या आंदोलनात सहभागी झालेल्या बार्शी शहरातील मेडिकल संघटनेचे पदाधिकारी व सदस्यांनी काळ्या फिती लावून शासनाच्या धोरणाविरोधात निषेध व्यक्त केला. तसेच आपल्या विविध मागण्यांचे निवेदन नायब तहसीलदार सुभाष बडे यांना देण्यात आले.
अखिल भारतीय औषधी विक्रेता संघटनेच्यावतीने देशभरात सुरु असलेल्या बेकायदेशीर इंटरनेट फार्मसी, ऑनलाईन औषध विक्री ई-पोर्टल तसेच GSR 817(E) दि. २८ ऑगस्ट २०१८ आणि कोविड काळातील GSR 220(E) दि. २६ मार्च २०२० या निर्णयांना विरोध दर्शविण्यात आला आहे. या संदर्भात संबंधित मंत्री व प्रशासकीय अधिकाऱ्यांना वारंवार निवेदने देऊनही शासनाकडून सकारात्मक प्रतिसाद मिळत नसल्याने संघटनेने देशव्यापी बंदचे आवाहन केले होते.
या बंदमध्ये बार्शी शहर व तालुक्यातील सर्व औषध विक्रेते सहभागी झाले होते. संघटनेने पंतप्रधान नरेंद्र मोदी यांना निवेदन पाठवून ऑनलाईन औषध विक्री तात्काळ बंद करण्याची मागणी केली आहे.
दरम्यान, रुग्णांची गैरसोय होऊ नये यासाठी बार्शीतील मेडिकल संघटनेने अत्यावश्यक सेवा सुरु ठेवण्याचा निर्णय घेतला होता. त्यानुसार शहरातील काही हॉस्पिटलमधील मेडिकल सेवा सुरु ठेवण्यात आली होती.
अत्यावश्यक सेवेसाठी सुरू ठेवण्यात आलेली मेडिकल्स –
डॉ. जगदाळे मामा हॉस्पिटल मेडिकल सुविधा हॉस्पिटल मेडिकल महालक्ष्मी मेडिकल, डॉ. अंधारे हॉस्पिटल श्री समर्थ मेडिकल, डॉ. पडवळ हॉस्पिटल प्रगती मेडिकल, डॉ. सोमाणी हॉस्पिटल शिवाई मेडिकल, वैराग
चौकट —बार्शी मेडिकल संघटनेचे अध्यक्ष सुधीर राऊत, मोईज काझी, प्रशांत बारसकर, हेमंत गांधी, सुनील ललवाणी, राजेश राऊत, अभिजित गाढवे, संजय पाटील यांनी समाज माध्यमांद्वारे संघटनेच्या प्रमुख पदाधिकाऱ्यांचे संपर्क क्रमांक प्रसिद्ध करुन नागरिकांना आपत्कालीन परिस्थितीत संपर्क साधण्याचे आवाहन करण्यात आले होते.
