२ महिने अंथरुणाला खिळून होती सुहानी, वडिलांनी सांगितलं लेकीच्या निधनाचं कारण; दुर्धर आजाराने संपलं आयुष्य
‘दंगल’ सिनेमात छोटी बबीता कुमारी बनलेली सुहानी भटनागरच्या अचानक झालेल्या मृत्यूनंतर संपूर्ण इंडस्ट्रीसह, चाहत्यांनाही मोठा धक्का बसला आहे. १९ वर्षीय सुहानी मागील अनेक दिवसांपासून आजारी होती, अखेर १७ फेब्रुवारी रोजी तिची प्राणज्योत मालवली. सुहानीच्या निधनानंतर तिच्या आई-वडिलांवर दु:खाचा डोंगर कोसळला असून त्यांनी मोठ्या हिमतीने मीडियाशी चर्चा केली आहे. सुहानीच्या वडिलांनी त्यांची लेक कोणत्या परिस्थितीतून जात होती, तिचं निधन नेमकं कसं झालं याबाबत माहिती दिली.
सुहानीला ऑटो इम्यून डिसऑर्डर होता. त्यावर उपचार सुरू होते. ती १० ते ११ दिवस दिल्लीतील एम्स रुग्णालयात दाखल होती. डॉक्टरांच्या अथक प्रयत्नांनंतरही तिला वाचवता आलं नाही. सुहानीच्या आई-वडिलांनी सांगितलं, की दोन महिन्यांपासून ती अंथरुणाला खिळून होती. तिला दुर्धर आजार झाला होता.
मीडिया रिपोर्टनुसार, सुहानीच्या वडिलांनी सांगितलं, की २ महिन्यांपूर्वी सुहानीच्या हातावर उटल्या बाजूने सूज येऊ लागली होती. त्यांना ती सूज साधारण असल्याचं वाटलं. त्यानंतर सूज हळूहळू संपूर्ण शरीरावर पसरली. सुहानीच्या वडिलांनी लेकीला अनेक डॉक्टरांना दाखवलं. पण कोणताही डॉक्टर योग्य निदान करू शकला नाही. सुहानीला नेमकं काय झालं आहे, कोणता आजार झाला आहे, हे डॉक्टर ओळखू शकले नव्हते.
काय होता आजार?
सुहानी भटनागरला जवळपास ११ दिवसांपूर्वी दिल्लीतील एम्स रुग्णालयात दाखल करण्यात आलं होतं. एम्समध्ये डॉक्टरांनी सुहानीच्या काही टेस्ट केल्या, त्यात सुहानीला डर्मेटोमायोसाइटिस नावाचा दुर्धर आजार असल्याचं सांगितलं. या आजारावर स्टेरॉइट हा एकमेव उपाय आहे.
आजारावर स्टेरॉइट हाच एक उपाय
सुहानीच्या वडिलांनी सांगितलं, की तिच्या आजाराचं निदान झाल्यानंतर तिला स्टेरॉइड्स देण्यास सुरुवात केली. पण स्टेरॉइटमुळे सुहानीच्या ऑटो इम्यून सिस्टमवर परिणाम झाला आणि हळूहळू ती कमजोरी होऊ लागली. डॉक्टरांनी हा आजार बरा होण्यासाठी वेळ लागणार असल्याचं सांगितलं होतं, पण सुहानी इतकी अशक्त झाली होती, की तिला स्टेरॉइट सहन झाले नाहीत.
रोगप्रतिकार शक्ती कमी झाली
रोगप्रतिकार शक्ती कमी झाल्याने सुहानीला इन्फेक्शन झालं होतं. त्यामुळे तिची फुफ्फुस कमकूवत झाली आणि शरीरात पाणी भरलं होतं. त्यामुळे तिला श्वास घेण्यास त्रास होत होता. अखेर १७ फेब्रुवारी रोजी संध्याकाळी सुहानीने या जगाचा अखेरचा निरोप घेतला.
