‘बिनशर्त’ची वेळ संपली, भाजपने मनसेला शिंगावर घेतलं, पानसेंविरुद्ध निरंजन डावखरे

लोकसभा निवडणुकांच्या निकालास एक दिवस बाकी असतानाच विधानपरिषदेच्या तीन जागांसाठी उमेदवार जाहीर करत भाजपने चुरस वाढवली आहे. कोकण पदवीधर मतदारसंघातून भाजपने विद्यमान विधानपरिषद आमदार निरंजन डावखरे यांना पुन्हा एकदा संधी दिली आहे. महायुतीला बिनशर्त पाठिंबा देणाऱ्या राज ठाकरे यांनी अभिजीत पानसे यांना कोकण पदवीधर मतदारसंघातून महाराष्ट्र नवनिर्माण सेनेचा उमेदवार म्हणून रिंगणात उतरवलं आहे. तिथे भाजप पाठिंबा देईल, अशी साहजिकच मनसेची अपेक्षा असावी. मात्र त्यानंतरही पानसेंविरोधात डावखरेंना मैदानात उतरवून भाजपने थेट मनसेलाच शिंगावर घेतलं आहे

कोकण पदवीधर मतदारसंघातून निरंजन डावखरे, मुंबई पदवीधर मतदारसंघातून किरण शेलार, तर मुंबई शिक्षक मतदारसंघातून शिवनाथ दराडे यांना मैदानात उतरवण्यात आलं आहे. इतकंच नाही, तर उपमुख्यमंत्री अजित पवारांच्या राष्ट्रवादी काँग्रेस पक्षाकडून मुंबई शिक्षक मतदार संघासाठी शिवाजीराव नलावडे यांची उमेदवारी जाहीर करण्यात आली आहे. त्यांच्याही विरोधात भाजपने शिवनाथ दराडेंना तिकीट देत महायुतीतच एकी नसल्याचं निकालाच्या आदल्याच दिवशी दाखवून दिलं आहे.

भाजपचे विधानपरिषद उमेदवार

मुंबई शिक्षक – शिवनाथ दराडे
मुंबई पदवीधर – किरण शेलार
कोकण पदवीधर – निरंजन डावखरे

कसा रंगणार सामना?

मुंबई शिक्षक – शिवनाथ दराडे (भाजप) विरुद्ध ज. मो. अभ्यंकर (ठाकरे गट) विरुद्ध शिवाजीराव नलावडे (अजित पवार गट)
मुंबई पदवीधर – किरण शेलार (भाजप) विरुद्ध अनिल परब (ठाकरे गट)
कोकण पदवीधर – निरंजन डावखरे (भाजप) विरुद्ध अभिजीत पानसे (मनसे)

लोकसभा निवडणुकांच्या प्रचारात राज ठाकरे यांना हिरीरीने सहभागी करुन घेतल्यानंतर कोकण पदवीधर मतदारसंघातील एका जागेसाठी तरी भाजप मनसेला पाठिंबा देईल, अशी अपेक्षा राजकीय वर्तुळात व्यक्त केली जात होती. परंतु भाजपने मनसेच्या अपेक्षांना सुरुंग लावल्याचं चित्र आहे. राज ठाकरेंनी आधीच उमेदवार घोषित करुन भाजपच्या मनात काय चाललंय, याची चाचपणी केल्याची चर्चा होती. म्हणजे आगामी विधानसभा, महापालिका यांच्या जागावाटपाचा कुठलाच अधिकृत करार झाला नसताना, आपला मित्र आपल्या मदतीला येणार का, हे राज ठाकरे पडताळून पाहत असावेत, असं बोललं जात होतं. मात्र राज ठाकरे ज्यांना जवळचा मित्र मानतात, त्या शेलारांनीच मनसेविरोधात उमेदवार देण्याची भूमिका घेतल्याने महायुतीत सारं आलबेल नसल्याचं चित्र आधीच निर्माण झालं होतं.