सोलापूर – इंडियन मॉडेल इंटरनॅशनल स्कूल प्रायोजित दुसऱ्या पर्वाच्या ‘इंडियन मॉडेल महिला पेरेंट्स बॉक्स क्रिकेट लीग’च्या सलामीच्या लढतीत ‘आयएमएस वॉरियर्स’ आणि ‘थंडर्स क्वीन्स’ या संघांनी आपापल्या सामन्यात शानदार विजय मिळवून स्पर्धेत धडाकेबाज सुरुवात केली.
३० जूनपर्यंत चालणाऱ्या या स्पर्धेचे उद्घाटन शाळेचे संस्थापक अध्यक्ष अमोल जोशी आणि श्री साई महिला प्रतिष्ठानच्या सचिव सायली जोशी यांच्या हस्ते मैदानाचे पूजन करून करण्यात आले. यावेळी मुख्याध्यापिका अपर्णा कुलकर्णी, मानसी जोशी, ममता बसवंती, आदिती कुलकर्णी, अचला राचर्ला, रूही काझी आदी मान्यवर उपस्थित होते.
रात्रीच्या प्रकाशझोतात टेनिस बॉलवर ७ षटकांच्या खेळवल्या जाणाऱ्या या स्पर्धेच्या उद्घाटनाचा पहिला सामना ‘ वॉरियर्स’ विरुद्ध ‘द रॉयल मॉम स्ट्रायकर्स’ यांच्यात झाला. यात प्रथम फलंदाजी करताना आयएमएस वॉरियर्स संघाने ७ षटकांत १ बाद ७१ धावांचा डोंगर उभारला. प्रत्युत्तरादाखल द रॉयल मॉम स्ट्रायकर्स संघाला ७ षटकांत ५ बाद ४२ धावांपर्यंतच मजल मारता आली. हा सामना वॉरियर्स संघाने २९ धावांनी जिंकला. उत्कृष्ट कामगिरीबद्दल साक्षी कोटा हिला ‘सामनावीर’ पुरस्काराने गौरविण्यात आले.
स्पर्धेतील दुसरा सामना ‘रायझिंग स्टार मॉम’ विरुद्ध ‘ थंडर्स क्वीन्स’ यांच्यात खेळवला गेला. प्रथम फलंदाजी करताना रायझिंग स्टार मॉम संघाने ६.२ षटकांत ६ बाद २२ धावा केल्या. हे आव्हान आयएमएस थंडर्स क्वीन्स संघाने ६.५ षटकांत ६ बाद २३ धावा करत १ गडी राखून पूर्ण केले आणि विजयावर शिक्कामोर्तब केले. या सामन्यात तबस्सूम शेख हिला ‘सामनावीर’ घोषित करण्यात आले. शहा व कुलकर्णी एस. के. डेव्हलपर्स यांच्या वतीने स्पर्धेतील सर्व ट्रॉफी आणि मेडल प्रायोजित करण्यात आले आहेत.
स्पर्धेचे हे दुसरे वर्ष असून यात ५ संघ व ४० महिला पालक खेळाडू सहभागी झाले आहेत. डिजिटल युगाची पावले ओळखत आधुनिक ॲपच्या माध्यमातून लाइव्ह स्कोरिंग आणि खेळाडूंचा विविध रंगांतील आकर्षक गणवेश हे या स्पर्धेचे मुख्य वैशिष्ट्य ठरत आहे. स्पर्धेत उत्कृष्ट फलंदाज, उत्कृष्ट गोलंदाज, मालिकावीर व सामनावीरांना आकर्षक स्मृतीचिन्हे दिली जाणार आहेत. स्पर्धा यशस्वी करण्यासाठी आयोजन समितीचे सचिन ढवाण, अक्षय माने, रविकिरण आवटे, राजकुमार माने, अजय चाबुकस्वार, आरती काजळे आदी परिश्रम घेत आहेत. कार्यक्रमाचे सूत्रसंचालन अनुपमा पकाळे यांनी केले, तर आभार सचिन ढवाण यांनी मानले.
