सोयाबीन पिकावर येलो मोझॅक रोगाचा प्रादुर्भाव; पिके उपटून टाकण्याची शेतकऱ्यांवर वेळ
जाफ्राबाद प्रतिनिधी
जाफ्राबाद तालुक्यात खरीप हंगामात सोयाबीनची लागवड करण्यात आली आहे. पाऊस पडल्यानंतर पीक आत कुठे बहरू लागले आहे. यातच सोयाबीन पिकावर येलो मोझॅक रोगाचा प्रादुर्भाव पडल्याचे पाहण्यास मिळत आहे. यामुळे शेतकऱ्यांवर संकट ओढवले असून सोयाबीन पिक धोक्यात आले आहे पिकावर रोग पडल्यामुळे सोयाबीन हे खरीप हंगामातील मुख्य पीक असून जालना जिल्ह्यात मोठ्या प्रमाणात सोयाबीन पिकाची लागवड करण्यात येत असते.
यावर्षी देखील मोठ्या संख्येने शेतकऱ्यांनी सोयाबीन पिकाची लागवड केली असून या पिकांवर आता येलो मोझॅक प्रादुर्भाव झाल्याने शेतकरी अडचणीत सापडला आहे. तालुक्यातील देऊळझरी परिसरातील लागवड करण्यात करण्यात आलेल्या सोयाबीन पिकावर येलो मोझॅक म्हणजेच केवडा रोगाचा प्रादुर्भाव दिसून येत असून सोयाबीन पिके धोक्यात आली आहेत. शेतकऱ्यावर अस्मानी संकट येतच राहते. हंगाम ऐन भारत असताना निसर्गाच्या लहरीपणामुळे नुकसान होत असते.
अवकाळी पावसामुळे शेतकऱ्याला अधिक आर्थिक फटका बसत असतो. दरम्यान खरीप हंगाम सुरु झाल्यानंतर शेतकऱ्यावर संकट उभे राहिले आहे. सोयाबीन पिकावर या रोगाचा जास्त प्रादुर्भाव झाल्याने काही शेतकऱ्यांवर संपूर्ण पीक उपटून टाकण्याची वेळ आलेली आहे. यामुळे शेतकरी आर्थिक अडचणीत सापडला आहे.
