करमाळा – शहरासह ग्रामीण भागात सध्या तरुण पिढी एका अत्यंत घातक आणि जीवघेण्या व्यसनाच्या आहारी गेल्याचे धक्कादायक चित्र समोर येत आहे. तरुणांमध्ये सध्या ‘Prega 300’ (प्रिगाबालिन) या गोळ्या आणि विविध प्रकारच्या नशेच्या इंजेक्शनची मोठी क्रेझ निर्माण झाली असून, करमाळ्याची तरुण पिढी वेगाने अंमली पदार्थांच्या दलदलीत रुतत चालली आहे. या गंभीर परिस्थितीचा गैरफायदा घेत काही बेकायदेशीर विक्रेते आणि मेडिकल माफिया गब्बर होत असताना, जबाबदार अधिकारी वर्ग मात्र हातावर हात धरून ‘गप्प’ बसल्याने नागरिकांमधून तीव्र संताप व्यक्त होत आहे.
•काय आहे ‘Prega 300’ चा प्रकार?
मूळत: ‘प्रिगाबालिन ३०० एमजी’ हे औषध मेंदूच्या नसांशी संबंधित तीव्र वेदना कमी करण्यासाठी किंवा डॉक्टरांच्या सल्ल्याने फिट्स (मिरगी) सारख्या आजारांवर दिले जाते. परंतु, या गोळ्यांचे अतिप्रमाण घेतले असता एक वेगळ्याच प्रकारची नशा चढते. हेच कारण आहे की, करमाळ्यातील महाविद्यालयीन तरुण, अल्पवयीन मुले आणि रोजंदारीवर काम करणारे कामगार या गोळ्यांच्या आहारी गेले आहेत. यासोबतच काही विशिष्ट प्रकारची वेदनाशामक इंजेक्शन्स देखील नशेसाठी सर्रास वापरली जात आहेत.
•विक्रेते मालामाल, तरुण कंगाल!
या नशेच्या बाजारात एजंट आणि काही काळेधंदेवाले सक्रिय आहेत. डॉक्टरांच्या चिठ्ठीशिवाय ही औषधे देणे कायद्याने गुन्हा असतानाही, केवळ पैशांच्या हव्यासापोटी काही ठिकाणी ही औषधे चढ्या दराने विकली जात आहेत.
•१० ते २० रुपयांना मिळणारी गोळी नशेबाजांना १०० ते १५० रुपयांना विकली जात आहे.
या काळ्या बाजारामुळे विक्रेत्यांचे खिसे भरत आहेत, तर दुसरीकडे हजारो तरुणांचे आयुष्य उद्ध्वस्त होत असून त्यांचे कुटुंबे रस्त्यावर येत आहेत.
•अधिकारी वर्ग सुस्त; कुणाचे अभय?
शहरातील काही विशिष्ट भागात, कट्ट्यांवर आणि निर्जन ठिकाणी औषधांच्या रिकाम्या पट्ट्या आणि इंजेक्शनच्या सुया मोठ्या प्रमाणावर आढळून येत आहेत. ही बाब उघडकीस येऊनही अन्न व औषध प्रशासन (FDA) आणि स्थानिक पोलीस प्रशासन याकडे डोळेझाक करत असल्याचा आरोप सर्वसामान्य जनतेतून होत आहे.
अधिकारी वर्ग नेमकी कशाची वाट पाहत आहे? शहरात एखादा मोठा अनर्थ घडल्यावर प्रशासन जागे होणार का?” असा संतप्त सवाल करमाळ्यातील सुज्ञ नागरिक विचारत आहेत.
•पालकांनो, मुलांवर लक्ष ठेवा!
या प्राणघातक नशेमुळे तरुणांमध्ये चिडचिडपणा वाढणे, गुन्हेगारी प्रवृत्ती बळावणे, आणि अकाली मृत्यू येण्याचा धोका निर्माण झाला आहे. आपल्या घरातील तरुण मुलगा काय करतो, त्याचे मित्र कोण आहेत, त्याच्याकडे जास्त पैसे कुठून येतात आणि त्याच्या वर्तनात काही बदल झाला आहे का, यावर पालकांनी बारीक लक्ष ठेवणे गरजेचे झाले आहे.
•तात्काळ कारवाईची मागणी
करमाळा शहराला लागलेला हा नशेचा कलंक पुसण्यासाठी प्रशासनाने आता तात्काळ पावले उचलण्याची गरज आहे. बेकायदेशीर औषध विक्री करणाऱ्या मेडिकल दुकानांवर आणि एजंटांवर छापे टाकून कडक कायदेशीर कारवाई करावी, अशी मागणी करमाळा शहरातील विविध सामाजिक संघटना आणि पालकांनी केली आहे.
