सोलापूर : सोलापूर महापालिकेच्या कारभारात निर्णायक भूमिका बजावणाऱ्या स्वतंत्र बजेट असलेल्या महिला व बालकल्याण समितीसह विविध ७ समित्यांच्या सभापतीपदासाठी प्रत्येकी एक अर्ज नगरसचिव कार्यालयात दाखल करण्यात आले. यामुळे ही निवड बिनविरोध निश्चित झाली असून यावर शुक्रवारी होणाऱ्या सभेत औपचारिक शिक्कामोर्तब करण्यात येणार आहे. या निवडीतून विधानसभा मतदारसंघ आणि सामाजिक समतोल राखण्याचा प्रयत्न भाजपाने केल्याचे दिसून येते. शहर उत्तर सोलापूर मतदार संघाला झुकते माप देत तीन सभापतीचा मान मिळाला आहे.
सोलापूर महानगरपालिकेच्या विविध विषय समितींच्या सभापतीपदाच्या निवडणुकीसाठी आज महानगरपालिका मुख्यालयातील नगरसचिव कार्यालयात महापौर विनायक कोंड्याल, उपमहापौर ज्ञानेश्वरी देवकर, सभागृह नेते नरेंद्र काळे, शहराध्यक्ष तथा नगरसेविका सौ. रोहिणी ताई तडवळकर तसेच इतर पदाधिकारी आणि नगरसेवक-नगरसेविकांच्या समवेत इच्छुक उमेदवारांनी नगरसचिव प्रवीण दंतकाळे यांच्याकडे आपले उमेदवारी अर्ज सादर केले. सातही समिती सभापती पदासाठी प्रत्येकी एकमेव अर्ज दाखल झाले आहेत. प्रारंभी सकाळी सभागृह नेत्यांच्या कार्यालयात पार्टी मीटिंग पार पडली. त्यानंतर उमेदवारी अर्ज दाखल करण्यात आले.
शुक्रवार, दि. ३ जुलै रोजी निवडणूक प्रक्रिया राबविण्यात येणार आहे. शासनाने मुंबई प्रांतिक महापालिका अधिनियमाचे नियम २००७ आणि २००८ च्या अधिसूचनेनुसार सुधारणा करून मुंबई प्रांतिक महापालिका अधिनियम २००८ मध्ये संमत केलेले असून त्यानुसार समित्या व इतर समित्यांच्या सभापतींच्या निवडणुकीसाठीच्या विशेष बैठकीच्या अध्यक्षस्थानी विभागीय आयुक्त अथवा त्यांच्या प्रतिनिधी असेल अशी तरतूद करण्यात आलेली आहे. विभागीय आयुक्तांच्या आदेशानुसार, शुक्रवार दि. ३ मे रोजी महापालिका कौन्सिल हाॅलमधील क्रांतीज्योती सावित्रीबाई फुले सभागृहात महापालिकेच्या स्थापत्य समिती, वैद्यकीय सहाय व आरोग्य समिती, विधी समिती, शहर सुधारणा समिती, मंड्या व उद्यान समिती, कामगार व समाज कल्याण समिती, महिला व बालकल्याण समिती या सात विषय सभापती पदाची निवडणूक प्रक्रिया याच क्रमवारीनुसार सकाळी ११ वाजता
सुरू होणार आहे. यानंतर एकेक समितीला टप्प्याटप्प्याने ११:३०, १२ आणि दुपारी १२:३०, १, व २ वाजता प्रत्येक समितीसाठी स्वतंत्रपणे मतदानाची वेळ निश्चित करण्यात आली आहे. निवडणूक अधिकारी म्हणून अपर जिल्हाधिकारी गणेश निऱ्हाळी यांची नियुक्ती करण्यात आली आहे. निवड प्रक्रिया होणार आहे. प्रत्येकी एक अर्ज आल्यामुळे ही बिनविरोध निवडणूक होणार आहे. त्यावर शुक्रवारी होणाऱ्या सभेत शिक्कामोर्तब होईल.
यांनी केले उमेदवारी अर्ज दाखल
यामध्ये स्थापत्य समिती सभापतीपदासाठी विजय चिप्पा (शहर मध्य), विधी समिती सभापतीपदासाठी सत्यजित वाघमोडे (दक्षिण सोलापूर), वैद्यकीय सहाय्य व आरोग्य समिती सभापतीपदासाठी सुनील खटके (शहर उत्तर), शहर सुधारणा समिती सभापतीपदासाठी स्वाती बडगु (शहर उत्तर), मंडई व उद्यान समिती सभापतीपदासाठी राजशेखर पाटील (दक्षिण सोलापूर), कामगार व समाजकल्याण समिती सभापतीपदासाठी श्रद्धा पवार (शहर उत्तर) तसेच महिला व बालकल्याण समिती सभापतीपदासाठी निर्मला जंगम ( शहर मध्य) यांनी उमेदवारी अर्ज दाखल केले.
उमेदवारी अर्ज दाखल करण्याच्या वेळी महापौर, उपमहापौर, सभागृह नेते, शहराध्यक्ष तसेच पदाधिकारी व नगरसेवक-नगरसेविकांनी उमेदवारांना शुभेच्छा दिल्या.
प्रत्येक समितीत भाजपाचे ८ तर
एमआयएमचा १ सदस्य
महापालिकेत सध्या भाजपाचे १०२ पैकी ८७ सदस्य असून आमदारांच्या गटांमध्ये सभापतीपदासाठी जोरदार हालचाली झाल्याची चर्चा ऐकायला मिळाली.महापालिकेच्या विशेष सात समित्यांमध्ये प्रत्येक समितीत ९ सदस्य असून यामध्ये भाजपाचे ८ तर एमआयएमचा १ सदस्य आहे. या समित्यांमध्ये प्रथमच काँग्रेससह शिवसेनेचा एकही सदस्य नाही.प्रत्येक उमेदवाराला अनुमोदक -सूचक असे दोन सदस्य आवश्यक असतात मात्र पक्षीय बलाबलानुसार एमआयएम या पक्षाला प्रत्येक समितीत एक सदस्य असल्याने त्यांना उमेदवारी अर्ज भरता येऊ शकत नाही. यामुळे भाजप उमेदवारांचे प्रत्येकी एक अर्ज दाखल झाल्याचे दिसून येते.
महिला व बालकल्याण समितीसाठी
अडीच कोटीचा निधी, सभापतींसाठी गाडी
महिला व बालकल्याण समितीचे सभापतीपद सर्वात महत्त्वाचे मानले जात असल्याने त्यासाठी चुरस पाहायला मिळाली. या समितीसाठी सुमारे दोन ते अडीच कोटीचा निधी उपलब्ध असतो. तसेच महापालिकेकडून सभापतीसाठी गाडी मिळते. या समिती सभापतीसाठी
निर्मला जंगम ( शहर मध्य) यांची वर्णी लागली आहे.
सोलापूर शहर उत्तरला झुकते माप
एकूण सात समित्यांपैकी तब्बल तीन सभापती हे सोलापूर शहर उत्तर मतदार संघातील आहे. यामुळे या मतदारसंघाला झुकते माप मिळाले आहे. शहर मध्य आणि सोलापूर दक्षिण या दोन्ही विधानसभा मतदारसंघाला प्रत्येकी दोन सभापतीचा मान मिळाला आहे. या निवडी करीत असताना विधानसभा मतदारसंघ आणि सामाजिक समतोल राखण्याचा प्रयत्न भाजपने केला असल्याचे दिसून येते. स्थापत्य समिती आणि महिला बाल कल्याण समिती महत्त्वाची मानली जाते. या दोन्ही समित्या सभापती शहर मध्यकडे आहेत.
