माळशिरस : जीवन सहारा परिवार, जैन सोशल ग्रुप अकलूज, माळशिरस पोलीस स्टेशन आणि से ट्रीज कंपनी यांच्या संयुक्त विद्यमाने “हरित वारी” या पर्यावरणपूरक उपक्रमांतर्गत एक लाखांहून अधिक सीडबॉल तयार करण्याचा महत्त्वाकांक्षी उपक्रम यशस्वीरित्या पार पडला.
हा उपक्रम सोलापूर ग्रामीणचे पोलीस अधीक्षक श्री. अतुल कुलकर्णी साहेब यांच्या प्रेरणा व मार्गदर्शनाखाली तसेच माळशिरस पोलीस स्टेशनचे पोलीस निरीक्षक दशरथ वाघमोडे साहेब , रोकडे साहेब व. दुबळ साहेब यांच्या मार्गदर्शनाखाली राबविण्यात आला.
पर्यावरण संवर्धनाच्या उद्देशाने वड, पिंपळ, उंबर, कडुनिंब, चिंच, आवळा यांसारख्या देशी, आयुर्वेदिक व अधिक प्राणवायू देणाऱ्या वृक्षांच्या विविध बियांचे संकलन करून त्यापासून एक लाखांहून अधिक सीडबॉल तयार करण्यात आले.
या उपक्रमात माळशिरस येथील सहा शाळांतील ५०० हून अधिक विद्यार्थ्यांनी उत्स्फूर्त सहभाग नोंदवला. त्यामध्ये गोपाळराव देव प्रशाला, क्रांतीज्योती सावित्रीबाई फुले प्रशाला, कन्या प्रशाला माळशिरस, माळशिरस प्रशाला, मारुती नाना कुलकर्णी प्राथमिक विद्यालय आणि आप्पासाहेब देशमुख विद्यालय या शाळांचा समावेश होता. विद्यार्थ्यांनी पर्यावरण संरक्षणाची जबाबदारी स्वीकारत मोठ्या उत्साहाने सीडबॉल तयार केले.
या उपक्रमाच्या यशस्वी आयोजनासाठी जैन सोशल ग्रुपचे व जीवन सहारा परिवारचे सीए अमित दोशी , प्रितेश गांधी, पियुष दोशी , गौरव फडे, अमोल वैद्य, सुरेंद्र दोभाडा , मयूर दोशी, सतीश दोशी, डॉक्टर निलेश फडे, अल्पेश दोशी, बाहुबली गांधी तसेच से ट्रीझ प्रोजेक्ट मॅनेजर दादा वाघमोडे, कृष्णा वाघमोडे यांनी विशेष परिश्रम घेतले.
तयार करण्यात आलेले एक लाखांहून अधिक सीडबॉल्स पावसाळ्यात डोंगराळ भाग, ओलसर क्षेत्रे तसेच वनवाढीस पोषक ठिकाणी जीवन सहारा परिवार, जैन सोशल ग्रुप अकलूज आणि माळशिरस पोलीस स्टेशन यांच्या संयुक्त विद्यमाने नियोजनबद्ध पद्धतीने विखुरले जाणार आहेत.
