बाजारात पडलेले कांद्याचे दर, अवकाळी पावसानं होणारं नुकसान यामुळं शेतकरी मोठ्या संकटात सापडला आहे. राज्य सरकारनं कांदा उत्पादक शेतकऱ्यांना अनुदान जाहीर केलं आहे. मात्र, कांदा उत्पादकांचा प्रश्न सुटताना दिसत नाही. कांदा उत्पादकांच्या कांद्याला बाजारात कवडीमोल भाव मिळत असल्याचं चित्र आहे. धाराशिव जिल्ह्यातील कांदा उत्पादक शेतकरी बिभीषण करळे यांनी २४४५ किलो कांदा ४७ पोत्यातून बाजार समितीत नेला होता. कांद्याला १५ ते १६ रुपयांपर्यंत भाव मिळेल, अशी माहिती चौकशी केल्यानंतर त्यांना मिळाली होती. मात्र, जेव्हा बाजार समितीत ते पोहोचले तेव्हा त्यांच्या पायाखालची जमीन सरकली. व्यापाऱ्यालाच स्वतःच्या खिशातून ८०६ रुपये देऊन त्यांना गावाकडे परतावे लागले.
विठ्ठलवाडी येथील बिभीषण करळे यांना आपल्या शेतातील ४७ पोती म्हणजे २४ क्विंटल कांद्याची पट्टी २२१२ रुपये आली, तर आडतीवर खर्च ३०१८ रुपयांचा खर्च झाला. या शेतकऱ्याने तीन प्रतीत कांद्याची वर्गवारी केल्यावर २४ क्विंटल ४५ किलो वजन भरले. ५०, ७५ आणि १०० प्रति क्विंटल रुपयांप्रमाणे दर मिळाला. करळे यांची २२१२ रुपयांची पट्टी झाली. यामध्ये तोलाई, हमाली, हाताळणी, वारणी, वाहतूक भाड्याचे मिळून ३०१८ रुपये खर्च आला. यामुळे करळे यांना स्वतःच्या खिशातील अतिरिक्त ८०६ रुपये सोलापूरच्या आडत्याला द्यावे लागले.
करळे यांनी आपल्या दोन एकर उसात आंतरपीक म्हणून कांदा लावला. प्रचंड मेहनतीने कांद्याचे चांगले पीक आले.परंतु, अवकाळी पावसामुळे या शेतकऱ्याचा कांदा भिजून मोठे नुकसान झाले. पावसापासून कसाबसा वाचविलेला ४७ पोती कांदा सोलापूरच्या बाजारात विक्रीसाठी घेऊन जातच भाव न मिळाल्याने पदरमोड करून निराश होऊन घरी परतावे लागले.
बिभीषण करळे यांनी महाराष्ट्र टाइम्स ऑनलाइनशी बोलताना कांद्याची रोपं बाहेरुन आणली होती. कांदा लागवडीपासून आतापर्यंत ३० ते ३५ हजार रुपये खर्च झाला. सोलापूरच्या बाजार समितीत कांदा नेण्यापूर्वी अवकाळीनं मोठं नुकसान झालं. चांगला कांदा विक्रीला नेण्यापूर्वी सोलापूरला चौकशी केली होती. १५ ते १६ रुपये देऊ असं म्हटले होते तिथं घेऊन गेलो अनं कांद्याचा लिलाव झाला नाही. अखेर २४४५ किलो कांदा विकला पण त्यातून काही रक्कम मिळण्याऐवजी ८०६ रुपये व्यापाऱ्यांना पदरचे द्यावे लागले, असं बिभीषण करळे म्हणाले. कांदा लागवडीतून काही परवडलं नाही, असं करळे म्हणाले.
सारिका बिभीषण करळे यांनी लागवड, खुरपणी, काढणी वेळी मोठा खर्च झाल्याचं सांगितलं. सोलापूरला कांदा घेऊन गेलो तिथं ४७ पोत्याचे २२०० रुपयांच्या आसपास बील झाले. कांदा लागवडीसाठी ३० ते ३५ हजार रुपये खर्च झाले. आता व्यापाऱ्यालाच ८०६ रुपये दिले आहेत. या कांद्याचं करायचं काय? नुकसान झालं आणि भाव पण भेटला नाही, असं सारिका करळे म्हणाल्या.
