उत्तर प्रदेशच्या मेरठमध्ये एक चक्रावून टाकणारा प्रकार समोर आला आहे. शहराच्या मधोमध असलेल्या नीरज चोप्राच्या पुतळ्याचा भाला चोरीला गेला आहे. या भागात सातत्यानं गस्त घातली जाते, असा दावा पोलीस करतात. पण तरीही वर्ल्ड चॅम्पियन नीरज चोप्राच्या पुतळ्याचा भाला चोरीला गेल्यानं आश्चर्य व्यक्त होत आहे.
मेरठच्या स्पोर्ट सिटी चौकात नीरज चोप्राचा पुतळा आहे. चौकाच्या सुशोभीकरणादरम्यान चोप्राचा पुतळा बसवण्यात आला होता. त्यात नीरज चोप्राच्या हातात भाला होता. मात्र आता पुतळ्याच्या हातातून भाला गायब झाला आहे. याचा तपास मेरठ पोलीस करत आहेत. घटना उघडकीस येताच आसपासचे रहिवासी चौकात जमले. त्यांनी पोलिसांच्या कामावर प्रश्नचिन्ह उपस्थित करत गोंधळ घातला. यावेळी पोलिसांविरोधात घोषणाबाजीदेखील करण्यात आली.
भरचौकात असलेल्या नीरज चोप्राच्या पुतळ्याचा भाला एकाएकी गायब झाल्यानं नागरिक संतापले. हा प्रकार मेरठ विकास प्राधिकरणापर्यंत पोहोचला. त्यानंतर त्यांनी दिलेल्या स्षष्टीकरणामुळे प्रकरणाला वेगळंच वळण लागलं. भाला चोरीला गेलेला नाही. तर तो बदलण्यात आला आहे, असं स्पष्टीकरण प्राधिकरणानं दिलं. ‘चोप्राच्या पुतळ्यातील भाला आम्हीच काढला आणि त्याच्या जागी खराखुरा भाला लाववण्यात आला आहे,’ असं प्राधिकरणाकडून स्पष्ट करण्यात आलं. त्यानंतर या प्रकरणावर पडदा पडला.
नीरज चोप्रानं नुकत्याच झालेल्या जागतिक ऍथेलिटिक्स चॅम्पियनशीपमध्ये सुवर्ण पदक पटकावलं. अंतिम फेरीत पहिल्या प्रयत्नात नीरजकडून फाऊल झाला. मात्र दुसऱ्याच प्रयत्नात त्यानं ८८.१७ मीटर दूरवर भाला फेकला. नीरजचं तिसऱ्या प्रयत्नात ८६.३२ मीटर, चौथ्या प्रयत्नात ८४.६४ मीटर, पाचव्या प्रयत्नात ८७.७३ मीटर आणि अंतिम प्रयत्नात ८३.९८ मीटर दूर भाला फेकला. अंतिम फेरीत पाकिस्तानचा अरशद नदीम दुसऱ्या स्थानी राहिला. त्यानं तिसऱ्या प्रयत्नात आपली सर्वोत्तम कामगिरी नोंदवली. त्यावेळी त्यानं ८७.८२ मीटर दूर भाला फेकला होता.
