काँग्रेस नेते राहुल गांधी यांनी मध्यप्रदेशात बोलताना आगामी निवडणुकीत पक्षाला केंद्रात सत्ता मिळाल्यास जातनिहाय जनगणना करण्याचे आश्वासन दिले. तसेच या वेळी त्यांनी आरएसएस आणि नोकरशहा देश चालवत असल्याची टीका केली.
‘काँग्रेस पक्षाला केंद्रात सत्ता मिळाल्यास देशातील ओबीसी लोकसंख्या कळण्यासाठी जातनिहाय जनगणना केली जाईल,’ असे आश्वासन काँग्रेस नेते राहुल गांधी यांनी शनिवारी दिले. मध्य प्रदेशातील शाजापूर जिल्ह्यातील कालापीपल विधानसभा मतदारसंघात आयोजित सभेत ते बोलत होते.
भारतीय जनता पक्षाच्या निवडून आलेल्या लोकप्रतिनिधींऐवजी राष्ट्रीय स्वयंसेवक संघ आणि केंद्र सरकारी अधिकारीच कायदे तयार करीत आहेत, अशी टीकाही राहुल यांनी केली. आगामी विधानसभा निवडणुकीच्या पार्श्वभूमीवर राहुल बोलत होते. मध्य प्रदेश हा भ्रष्टाचाराचा केंद्रबिंदू असल्याची टीका करून ते म्हणाले, ‘भाजपच्या सत्ताकाळात गेल्या १८ वर्षांत १८ हजार शेतकऱ्यांनी आपले जीवन संपविले.’
‘देश केवळ ९० अधिकाऱ्यांकडून चालवला जात आहे. यामध्ये कॅबिनेट सचिव आणि सचिवालयांचा समावेश आहे. नोकरशहा आणि राष्ट्रीय स्वयंसेवक संघाकडून देशातील कायदे बनविले जात आहेत, त्यामध्ये भाजपचे खासदार आणि आमदारांचा कोणताही सहभाग नाही,’ असे वक्तव्य राहुल यांनी केले.
महिला आरक्षणाची अंमलबजावणी होण्यासाठी दहा वर्षे लागतील. या कायद्यामध्ये ओबीसी आरक्षण का नाही?
– राहुल गांधी, नेते, काँग्रेस
बसप-‘जीजीपी’ची आघाडी
भोपाळ : वर्ष अखेर होऊ घातलेल्या मध्य प्रदेश विधानसभा निवडणुकीसाठी बहुजन समाज पक्ष आणि गोंडवाना गणतंत्र पक्षाने (जीजीपी) हातमिळवणी केली आहे. या पक्षांनी आघाडी केली असून, बसप १७८ जागा आणि जीजीपी ५२ जागा लढविणार आहे, अशी घोषणा बसपचे राज्यसभा खासदार रामजी गौतम आणि जीजीपीचे राष्ट्रीय सरचिटणीस बलबीरसिंह तोमर यांनी शनिवारी पत्रकार परिषदेत केली.
‘कुटुंबातील एकास नोकरी’
भोपाळ : मध्य प्रदेशमध्ये भाजपला पुन्हा सत्ता मिळाल्यास प्रत्येक कुटुंबातील एकाला नोकरी देण्यात येईल, असे आश्वासन मुख्यमंत्री शिवराजसिंह चौहान यांनी शनिवारी दिले. राज्यातील भाजप सरकार बेरोजगारीची समस्या सोडविण्यात अपयशी ठरल्याची टीका सातत्याने होत असल्याच्या पार्श्वभूमीवर चौहान यांनी ही घोषणा केली आहे. अलिराजपूर येथे आयोजित सभेत चौहान बोलत होते.
