डॉ. बाबासाहेब आंबेडकर यांच्या महापरिनिर्वाण दिनानिमित्त लाखोंच्या संख्येने अनुयायी चैत्यभूमीवर पोहोचले आहे. ६ डिसेंबर रोजी भारतीय राज्यघटनेचे शिल्पकार बाबासाहेब आंबेडकर यांचं महापरिनिर्वाण झालं.सकाळपासून चैत्यभूमीवर बाबासाहेबांच्या अनुयायांनी गर्दी केली आहे.
६७वा महापरिनिर्वाण दिन
डॉ. बाबासाहेब आंबेडकर यांच्या ६७व्या महापरिनिर्वाण दिनानिमित्त चैत्यभूमीवर अनेक आंबेडकरी साहित्य खरेदीचे स्टॉल लावण्यात आले आहेत. चैत्यभूमीवर पुस्तकांचेही स्टॉल लावण्यात आले असून अनेक अनुयायी पुस्तकांच्या दुकानात गर्दी करताना दिसत आहेत. महापरिनिर्वाण दिनाच्या पूर्वसंध्येलाच अनेक अनुयायी दादरमध्ये दाखल झाले असून त्यांनी चैत्यभूमीवर दर्शनासाठी रांगा लावल्या आहेत. चैत्यभूमीवर अनेक अनुयायी पोहोचले असून आंबेडकरवादी विचारांचेही लोक जमले आहेत.
डॉ. बाबासाहेब आंबेडकर त्यांच्या आयुष्याशी निगडित जगभरातील अनेक दुर्मिळ छायाचित्रांचा समावेश असलेली पुस्तिका पालिकेने प्रसिद्ध केली आहे. डॉ. आंबेडकर यांच्या व्यक्तिमत्त्वाचा संपूर्ण जगावरील प्रभाव, त्यांची प्रभावित करणारी भाषणे यासह भारतासह अनेक देशांमध्ये उभारण्यात आलेले त्यांचे पुतळे आदींच्या माहितीचा या पुस्तिकेत समावेश आहे. डॉ. बाबासाहेबांचा दूरदृष्टीपणा, अभ्यासूवृत्ती यावर या पुस्तकातील लेखांतून प्रकाश टाकण्यात आला आहे. ‘डॉ. बाबासाहेब आंबेडकर यांच्या जागतिक पाऊलखुणा’ ही संकल्पना पालिकेच्या जनसंपर्क विभागाने या माहिती पुस्तिकेसाठी निवडली आहे.
