महाराष्ट्रात आमदार अपात्र प्रकरणाची चर्चा सुरू असताना राजकीय घडामोडींनी वेग घेतलेले असताना शेजारच्या गुजरातमध्ये मोठ्या उद्योगपतींनी कोटींची गुंतवणूक जाहीर केली आहे.
राज्यात आमदार अपात्र प्रकरण चर्चेत असताना, राजकीय वर्तुळात घडामोडी सुरू असताना शेजारच्या गुजरातमध्ये कोट्यवधींची गुंतवणूक येत आहे. व्हायब्रंट गुजरात समीटमध्ये उद्योगपतींनी त्यांचा खजिना उघडला आहे. राज्यासाठी कोट्यवधींच्या घोषणा करण्यात आल्या आहेत. रिलायन्स, अदानी समूह, टाटा समूह, मारुती सुझुकीकडून कोट्यवधी रुपयांच्या प्रकल्पांची घोषणा करण्यात आली आहे.
व्हायब्रंट गुजरात ग्लोबल समीट २०२४ मध्ये रिलायन्स उद्योगाचे चेअरमन मुकेश अंबानींनी महत्त्वाच्या घोषणा केल्या. रिलायन्स पुढील १० वर्षे राज्यात गुंतवणूक सुरू ठेवेल, असं अंबानी म्हणाले. २०३० पर्यंत गुजरातमध्ये वापरल्या जाणाऱ्या एकूण ग्रीन एनर्जीपैकी निम्म्या उर्जेची निर्मिती रिलायन्स करत असेल. आर्टिफिशियल इंटेलिजन्समुळे गुजरातमध्ये नोकऱ्या उपलब्ध होतील. रिलायन्स रिटेल गुजरातमध्ये गुणवत्तापूर्ण उत्पादनं आणेल. देशातील पहिला कार्बन फायबरची स्थापना इथेच केली जाईल, असं अंबानी म्हणाले.
गौतम अदानींनीदेखील या समीटमध्ये मोठ्या घोषणा केल्या. येत्या ५ वर्षांत अदानी समूह २ लाख कोटी रुपयांची गुंतवणूक करणार आहे. यामुळे राज्यात १ लाख रोजगार निर्माण होतील, असं अदानी म्हणाले. गुजरातमध्ये विविध क्षेत्रांत आतापर्यंत ५० हजार कोटींची गुंतवणूक केली आहे. त्यातून २५ हजार नोकऱ्या निर्माण झाल्या, असं अदानींनी सांगितलं.
या समीटमध्ये टाटा सन्सचे चेअरमन एन. चंद्रशेखरन यांनी गुजरातसाठी खास घोषणा केल्या. टाटा समूहानं ८४ वर्षांपूर्वी म्हणजेच १९३९ मध्ये टाटा केमिकल्सच्या माध्यमातून राज्यात उद्योगाची सुरुवात केली. आज समूहात एकूण २१ कंपन्या आहेत. समूहानं राज्यात ५० हजारांपेक्षा अधिक जणांना रोजगार दिला आहे. येत्या काळात टाटा समूह साणंदमध्ये २० गीगावॉट लिथियम-आयर्न बॅटरीचा कारखाना उभारेल. टाटा समूह धोलेरामध्ये एक मोठा सेमीकंडक्टर हब तयार करेल, असं चंद्रशेखरन म्हणाले.
