मागील काही दिवसांतील तुरीचे भाव
तारीख २०२४ – किमान भाव- कमाल भाव-
२ जानेवारी – ७ हजार- ८,६८० रू.
६ जानेवारी – ६,८०० – ९,३२० रू.
१२ जानेवारी- ७,५०० – ९,३८० रू.
१७ जानेवारी- ६,८६० – ९,५६० रू.
गेल्या वर्षी आणि या हंगामात देशातील तुरीचं उत्पादन मोठ्या प्रमाणात घटलं आहे, त्यात बाजारात तुरीला चांगली मागणी आहे. कापूस आणि सोयाबीनला अपेक्षेनूसार भाव नसल्याने शेतकऱ्यांना तुरीकडून अपेक्षा उरल्या होत्या. विदर्भातल्या अकोला जिल्ह्यातील अकोला कृषी उत्पन्न बाजार समितीत तुरीनं पुन्हा ‘दहा’ हजारांचा टप्पा गाठला आहे. काल शुक्रवारी (१९ जानेवारी) आज शनिवारी तुरीला या हंगामातील सर्वांधिक उच्चांकी भाव मिळाला. १० हजार २८५ रूपये प्रतिक्विंटल प्रमाणे असा कालचा भाव होता. आजही तुरीच्या दरानं ‘१० हजार’ रूपयांचा टप्पा कायम ठेवला आहे, दरम्यान कापूस आणि सोयाबीनच्या दरापासून निराशा असलेल्या शेतकऱ्यांसाठी दिलासा देणारा हा भाव आहे.
अकोला कृषी बाजार समितीत मागील वर्षातील १ डिंसेबर २०२३ रोजी तुरीला किमान भाव ८ हजार पासून कमाल भाव १० हजार इतका होता. त्यानंतर सातत्याने तुरीच्या दरात घसरण पाहायला मिळाली होती. या हंगामात काल तुरीला चांगला भाव मिळाला आहे. दरम्यान बाजारात नवीन तूर दाखल झाली असून, मुहूर्ताला ९ हजारांवर भाव मिळाला होता. आता नववर्षात तुरीच्या दरात वाढ होत असल्याचे चित्र आहे, काल शुक्रवारी तुरीला उच्चांकी १० हजार २८५ रुपये प्रतिक्विंटल प्रमाणे भाव मिळाला. दरम्यान आजही २० जनेवारी रोजी अकोला बाजारात तुरीचे हे दर कायम होते. कमीत कमी ७ हजार ४०० पासून जास्तीत जास्त १० हजार २८५ रूपये असा क्विंटलमागे भाव मिळाला. तर सरासरी भाव ९ हजाररूपयांवर असून १ हजार ८५५ एवढी क्विंटल तुरीची आवक झाली आहे.
अकोला जिल्ह्यात तूर सोंगणी व काढणीला सुरुवात झाली आहे. यंदाच्या खरीप हंगामात पेरण्या उशिरानं झाल्याने हंगाम लांबला आहे. त्यात अपुऱ्या पावसामुळे खरीप पिकांच्या उत्पादनात प्रचंड घट झाली, तसेच तुरीचे पीक ऐन फुलधारणेच्या अवस्थेत असताना अवकाळी पावसाचा फटका बसला. त्यानंतर ढगाळ वातावरण व अळींच्या प्रकोपामुळे तुरीचे प्रचंड नुकसान झाले. त्यामुळ जिल्ह्यात तूर उत्पादनात प्रचंड घट झाली असून एकरी एक ते दोन क्विंटलच उत्पादन होत असल्याचे चित्र आहे.
देशातील इतर बाजार समित्यांतही तुरीला सरासरी चांगला भाव मिळतो आहे. तुरीच्या बाजार भावातील हीच तेजी कायम राहिल्यास आगामी दिवसात हे भाव सहजपणे ११ हजारांचा टप्पा गाठू शकणार आहेत, असा अंदाजही कृषी बाजार समितीतील बाजार अभ्यासकांनी व्यक्त केला आहे.
अंदाजे फ्रेब्रुवारी महिन्याच्या अखेरीस तुरीचा भाव १२ हजार रूपयांवर पोहचू शकेल, असाही अंदाज आहे. सोयाबीन आणि कापसाच्या दरामुळे शेतकरी चांगलाचं चिंतेत सापडला होता, त्यामुळे शेतकऱ्यांना तुरीकडून अपेक्षा राहिल्या होत्या. परंतु आज तुरीला मिळालेल्या दरामुळं तूर उत्पादक शेतकऱ्यांना दिलासा मिळाला आहे. दरम्यान आता पुढील काही दिवस तुरीच्या दरात संदर्भात तेजी कायम राहणार असून लवकरच तुरीच्या दराचा टप्पा ‘११ हजार’ रूपयांपर्यंत जाऊ शकतो, असा अंदाज बाजार समितीच्या कृषी अभ्यासकांनी व्यक्त केला आहे.
