पूनम पांडेने २ फेब्रुवारी रोजी तिच्या निधनाची खोटी बातमी पसरवली होती. २४ तासानंतर तिने लाईव्ह येत ती जिवंत असल्याचं म्हटलं. आता अभिनेत्रीविरोधात तक्रार दाखल करण्यात आली आहे.
अभिनेत्री आणि मॉडेल पूनम पांडेने २ फेब्रुवारी रोजी तिच्या निधनाची अफवा पसरवून सर्वांनाच धक्का दिला होता. तिच्या निधनाच्या बातमीने एकच खळबळ माजली होती. तिच्या इन्स्टाग्राम अकाऊंटवरुन गर्भाशयाच्या मुखाच्या कॅन्सरने तिचं निधन झाल्याची बातमी शेअर करण्यात आली होती. निधनाची बातमी समोर आल्यानंतर पूनम पांडेच्या मॅनेजरचे, तिच्या कुटुंबियांचे फोन बंद होते. अभिनेत्रीच्या मृतदेहाचा कोणताही पत्ता लागत नसल्याने तिच्या निधनाबाबत मोठा सस्पेन्स क्रिएट झाला होता.
पण २४ तासांनंतर ३ फेब्रुवारी रोजी पूनमने स्वत: लाईव्ह येत ती जिवंत असल्याचं सांगत पुन्हा एकदा सर्वांना धक्का दिला. गर्भाशयाच्या मुखाच्या कॅन्सरबाबत जनजागृती करण्यासाठी निधनाची खोटी बातमी पसरवल्याचं तिने सांगितलं. पूनम पांडेने लाईव्ह येत स्वत: या खोट्या बातमीबाबत स्पष्टीकरण दिलं. पण तिच्या या स्पष्टीकरणानंतर अनेकांनी तिच्यावर टिका केली आहे. अनेक सेलिब्रिटींसह, नेटकऱ्यांनीही अभिनेत्रीला या अफवेनंतर हे मृत्यूचं नाटक करणं अतिशय संतापजनक आणि लाजिरवाणं असल्याचं म्हटलं आहे.
पूनम पांडेविरोधात पोलिसात तक्रार दाखल
वकील अली काशिफ खान देशमुखने अभिनेत्री पूनम पांडेविरोधात पोलिसांत तक्रार दाखल करण्यात आली आहे. त्याशिवाय अभिनेत्रीची मॅनेजर निकिता शर्मा आणि एजेन्सी Hautterfly विरोधात आयपीसी कलम ४१७, ४२०, १२० बी, ३४ अंतर्गत एफआयआर दाखल करण्याची मागणी केली आहे. पूनम पांडेवर गर्भाशयाच्या कर्करोगाच्या नावाखाली लोकांची फसवणूक केल्याचा आरोप करण्यात आला आहे. पूनमचा हा स्टंट प्रसिद्धी आणि फसवणूक असल्याचं जाहीर करण्याची मागणी केली जात आहे.ऑल इंडिया सिने वर्कर्स असोसिएशननेही पूनम पांडेविरोधात एफआयआर दाखल करण्याची मागणी केली आहे. पूनम पांडेने पसरवलेली निधनाची खोटी बातमी, निधनाचा केलेला स्टंट अत्यंत चुकीचा आहे. गर्भाशयाच्या मुखाच्या कर्करोगाबाबत जनजागृती करण्याच्या नावाखाली तिने केलेली स्वत:ची जाहिरात अमान्य असल्याचं, ऑल इंडिया सिने वर्कर्स असोसिएशनच्या अधिकाऱ्यांनी म्हटलं आहे.
