दक्षिण आफ्रिकेविरुद्ध सुरू असलेल्या दुसऱ्या कसोटीत न्यूझीलंडच्या रचिन रविंद्रने द्विशतकी खेळी केली. त्याने २६ चौकार आणि ३ षटकारांसह ३६६ चेंडूत २४० धावा केल्या.
भारतीय वंशाचा आणि न्यूझीलंडचा स्टार युवा क्रिकेटपटू रचिन रविंद्रने पुन्हा एकदा दाखवून दिले की त्याला न्यूझीलंड क्रिकेटचा पुढचा सुपरस्टार का म्हटले जाते. दक्षिण आफ्रिकेविरुद्ध सुरू असलेल्या पहिल्या कसोटीच्या दुसऱ्या दिवशी रचिन करिअरमधील पहिले द्विशतक झळकावले. मॅचच्या पहिल्या दिवशी रचिनने नाबाद ११८ धावा केल्या होत्या. त्यानंतर दुसऱ्या दिवशी शतकाचे द्विशतक केले. फलंदाजीसोबत गोलंदाजी करणाऱ्या रचिनने कसोटीतील सातव्या डावात द्विशतक झळकावण्याची कामगिरी केली आहे. त्याने ३६६ चेंडूत २४० धावांची विक्रमी खेळी केली ज्यात २६ चौकार आणि ३ षटकारांचा समावेश आहे.
द्विशतकासह मोठे रेकॉर्ड्स
दक्षिण आफ्रिकेविरुद्ध द्विशतक करणारा रचिन हा न्यूझीलंडचा दुसरा फलंदाज ठरला आहे. याआधी माजी कर्णधार स्टीफन फ्लेमिंगने २००६ साली केपटाउन कसोटीत २६२ धावांची खेळी केली होती. – या शतकात दक्षिण आफ्रिकेविरुद्ध द्विशतक करणारा रचिन हा फक्त चौथा फलंदाज आहे. याआधी श्रीलंकेचा महेला जयवर्धने(३७४ आणि २३७), भारताचा विराट कोहली (नाबाद २५४), वेस्ट इंडिजा ब्रायन लारा(२०२) या फलंदाजांनी आफ्रिकेविरुद्ध द्विशतकी खेळी केली होती.- न्यूझीलंडच्या भूमीवर चौथ्या किंवा त्याच्या खालच्या क्रमांकावर खेळणाऱ्या फलंदाजाकडून झालेली ही तिसरी मोठी धावसंख्या आहे. या यादीत ब्रेंडन मॅकुलम (भारताविरुद्ध २०१४ साली ३०२ धावा), मार्टिन क्रो (श्रीलंकेविरुद्ध १९९१ साली २९९ धावा) यांचा समावेश आहे.
रचिन रविंद्रचे द्विशतक आणि केन विल्यमसनचे दमदार शतकाच्या जोरावर न्यूझीलंडने पहिल्या डावात ५११ धावा केल्या. केनने ११८ धावा केल्या. त्याने रचिनसह तिसऱ्या विकेटसाठी २३२ धावांची भागिदारी केली. त्यानंतर आफ्रिकेच्या गोलंदाजांनी न्यूझीलंडच्या फलंदाजांना फार काळ क्रीझवर टीकू दिले नाही. रचिनने डिरेल मिचेल आणि ग्लेन फिलिप्स यांच्यासह १०३ आणि ८२ धावांची भागिदारी केली. आफ्रिकेकडून फिरकीपटू नील ब्रांडने सर्वाधिक ६ विकेट घेतल्या.
दुसऱ्या दिवसाचा खेळ संपला तेव्हा द.आफ्रिकेने ८० धावांवर ४ विकेट गमावल्या होत्या. आफ्रिका अद्याप ४३१ धावांनी पिछाडीवर असून कसोटीवर न्यूझीलंडची पकड मजबूत झाली आहे.
