काँग्रेसचे दिग्गज नेते आणि माजी मुख्यमंत्री अशोक चव्हाण भारतीय जनता पक्षामध्ये प्रवेश करण्याची शक्यता आहे. आज ते आमदारकीचा आणि पक्ष सदस्यत्वाचा राजीनामा देतील आणि त्यानंतर त्यांचा भाजपमध्ये प्रवेश होईल अशी चर्चा आहे.
काँग्रेसचे दिग्गज नेते आणि माजी मुख्यमंत्री अशोक चव्हाण भारतीय जनता पक्षामध्ये प्रवेश करण्याची शक्यता आहे. आज ते आमदारकीचा आणि पक्ष सदस्यत्वाचा राजीनामा देतील आणि त्यानंतर त्यांचा भाजपमध्ये प्रवेश होईल अशी चर्चा आहे. चव्हाण यांनी भाजपमध्ये प्रवेश केल्यास तो काँग्रेससाठी मोठा धक्का असेल. भाजप त्यांना राज्यसभेवर पाठवण्याची शक्यता आहे.
अशोक चव्हाण यांचा राजीनामा अद्याप तरी विधिमंडळ सचिवालयात प्राप्त झालेला नाही. चव्हाण यांच्याकडून राजीनाम्याबद्दल कोणतीही माहिती देण्यात आलेली नाही. चव्हाण यांनी आज सकाळी विधानसभा अध्यक्ष राहुल नार्वेकर यांची भेट घेतली होती. त्यामुळे या चर्चेला उधाण आलं. चव्हाण यांनी नार्वेकरांची भेट घेऊन राजीनाम्याची प्रक्रिया समजून घेतली. मी पुन्हा येतो असं सांगून चव्हाण नार्वेकरांच्या कार्यालयातून निघाले. त्यामुळे चव्हाण यांच्या भाजप प्रवेशाच्या चर्चेनं जोर धरला. दुसऱ्या बाजूला काँग्रेसचे प्रदेशाध्यक्ष नाना पटोले दिल्लीला रवाना झाले आहेत. त्यामुळे चर्चेला आणखी उधाण आलं.
महाराष्ट्र काँग्रेसचे प्रभारी रमेश चेनिथल्ला काल मुंबईत होते. मुंबईमध्ये महाराष्ट्र काँग्रेसची प्रदेश कार्यकारणीची बैठक झाली होती. या बैठकीला अशोक चव्हाण हजर होते. आता त्यांच्या भाजप प्रवेशाची चर्चा सुरू झाली आहे. चव्हाण यांना राज्यात मंत्रिपद देण्यास भाजपच्या नेत्यांचा विरोध आहे. त्यामुळे त्यांना राज्यसभेवर पाठवलं जाऊ शकतं. भाजपच्या राज्यसभेच्या उमेदवारांची यादी आज जाहीर होऊ शकते. चव्हाण यांच्यासोबतच काँग्रेस नेते चंद्रकांत हंडोरे, नसीम खानदेखील भाजपमध्ये प्रवेश करण्याची शक्यता आहे.
