राज्यसभा निवडणुकीत भाजपनं ऑपरेशन लोटस करुन हिमाचल प्रदेशमधील एक जागा जिंकली. भाजपचे उमेदवार हर्ष महाजन विजयी झाले तर काँग्रेसचे उमेदवार अभिषेक मनू सिंघवी पराभूत झाले. काँग्रेसच्या सहा आमदारांच्या आणि तीन अपक्ष आमदारांनी भाजपला मतदान केल्यानं दोन्ही उमेदवारांना ३४-३४ मतं मिळाली. यामुळं हिमाचल प्रदेशातील मुख्यमंत्री सुखविंदरसिंह सुक्खू यांचं सरकार देखील संकटात सापडलं होतं. आज विधानसभेत हिमाचल प्रदेशचा अर्थसंकल्प सादर केला जाणार होता. भाजपनं काँग्रेस सरकार अल्पमतात असल्याचा दावा केला होता. भाजपचे विरोधी पक्षनेते जयराम ठाकूर यांनी मतविभागणीची मागणी केली होती. मात्र, भाजपच्या आमदारांवर विधानसभेत गैरवर्तन केल्याचा ठपका ठेवत निलंबनाची कारवाई करण्यात आली. भाजपला आमदारांचं निलंबन होईल अशी भीती होती, ती सत्यात उतरली आहे. भाजपच्या १५ आमदारांचं निलंबन करण्यात आलं आहे.
भाजपच्या कोणत्या आमदारांचं निलंबन करण्यात आलं?
विधानसभेत गैरवर्तन केल्या प्रकरणी हिमाचल प्रदेशच्या विधानसभा अध्यक्षांनी भाजपच्या १५ आमदारांवर निलंबनाची कारवाई केली आहे. यामध्ये जयराम ठाकूर, विपिन सिंह परमार, विनोद कुमार, जनक राज, बलवीर वर्मा, सुरेंद्र शौरी, इंतर सिंह गांधी, हंसराज, लोकेंद्र कमार, रणधीर शर्मा, रणवीर सिंह निक्का यांचा समावेश आहे.
विक्रमादित्य सिंह यांचा मंत्रिपदाचा राजीनामा
काँग्रेस नेते विक्रमादित्य सिंह यांनी त्यांच्या मंत्रिपदाचा राजीनामा दिला आहे. विधानसभा निवडणूक वीरभद्र सिंह यांच्या नावावर लढवली गेली, त्यांच्यामुळं काँग्रेसचं सरकार आलं पण त्यांची मूर्ती लावण्यासाठी शिमलामधील मॉलवर जमीन देण्यात आली नाही, हे दुर्दैवी होती, असं विक्रमादित्यसिहं म्हणाले. आमदारांकडे दुर्लक्ष केलं गेलं, आमदारांचा छळ करण्यात आला, असं देखील विक्रमादित्य सिंह म्हणाले.
हिमाचल प्रदेशमधील ज्या काँग्रेस आमदारांनी हर्ष महाजन यांना मतदान केलं होतं त्यांनी ते आता भाजपसोबत असल्याचं म्हटलं आहे. इंद्रजीत लखनपाल, चैतन्य शर्मा, सुधीर शर्मा,राजेंद्र राणा, देवेंद्र सिंह भुट्टो, रवी ठाकूर यांनी ते भाजपसोबत असल्याचं म्हटलं आहे.
