कुर्ला पश्चिम येथे सोमवारी रात्री एका कंत्राटदारावर आणि त्याच्या मित्रावर गोळीबार करण्यात आल्याची खळबळजनक घटना घडली. या हल्ल्यामधून दोघेही थोडक्यात बचावले असून गोळीबारामुळे कुर्ला परिसरात घबराट पसरली आहे. याप्रकरणी गोळीबार करणाऱ्या दोघांसह चार जणांवर गुन्हा दाखल करण्यात आला असून कुर्ला पोलिस आणि गुन्हे शाखेची पथके हल्लेखोरांचा शोध घेत आहेत. दरम्यान, ४५ कोटी रुपयांच्या कामाच्या टेंडरवरून हा हल्ला करण्यात आल्याची प्राथमिक माहिती आहे.
दहिसर पूर्व येथे वास्तव्यास असलेले कंत्राटदार सुरज प्रतापसिंग देवडा यांची धरम कन्स्ट्रक्शन कंपनी असून त्यांच्याकडे वेगवेगळ्या सरकारी कामांची अनेक कंत्राटे आहेत. म्हाडाकडून वांद्रे ते दहिसर फुटपाथ, नाल्याचे, पायवाटा कामाचे टेंडर काढण्यात आले आहे. धरम कन्स्ट्रक्शनने हे टेंडर भरले असून त्याची अनामत रक्कमदेखील भरली आहे. सोमवारी सुरज प्रतापसिंग हे मित्रासोबत कारने कुर्ला पश्चिम येथील पालिकेच्या एल विभाग कार्यालयात गेले होते. रात्री आठ वाजण्याच्या सुमारास दहिसरकडे कुर्ला-सांताक्रूझ रोडने जात असताना कपाडिया नगर या ठिकाणी दोघांनी दुचाकी कारच्या पुढे आडवी घातली. एकाने कारमध्ये बसलेल्या सुरज प्रतापसिंग यांच्यावर गोळी झाडली आणि कार थांबविण्याचा प्रयत्न केला. मात्र त्यांनी कार न थांबवता सांताक्रूझच्या दिशेने पळवली.
सुरज प्रतापसिंग हे थेट वाकोला पोलिस ठाण्यात पोहचले व त्यांनी घटनेची माहिती पोलिसांना दिली. वाकोला पोलिस आणि कुर्ला पोलिसांची पथके घटनास्थळी पोहोचली. सुरज प्रतापसिंग यांच्या कारचा पाठलाग करणारे पळून गेले. याप्रकरणी कुर्ला पोलिसांनी गुन्हा दाखल केला असून हल्लेखोर आणि हल्ल्याची सुपारी देणाऱ्यांचा शोध पोलिस घेत आहेत.
सुरज प्रतापसिंग यांनी म्हाडाचे टेंडर भरल्यानंतर त्यांना एका राजकीय पक्षाच्या पदाधिकाऱ्याने ते मागे घेण्यास सांगितले. त्यांनी नकार देताच या पदाधिकाऱ्याने ठार मारण्याची धमकी दिली होती. त्यामुळे या हल्ल्यामागे या राजकीय पक्षाच्या पदाधिकाऱ्यांचा हात असल्याचा संशय व्यक्त केला जात असून घटनेनंतर हे सर्व पदाधिकारी गायब असल्याने संशय अधिक बळावला आहे.
