वाशिम, 22 जून, (हिं.स.) सातत्यपूर्ण व एकात्मिक नियोजन प्रक्रिया, व्यवस्थित रचना, सहकार्य आणि आपत्तींच्या संभाव्य धोक्याला प्रतिबंध, आपत्तीतील धोक्यांची तीव्रता कमी करणे, क्षमता सबलीकरण, पूर्वतयारी, तत्पर प्रतिसाद, आपत्ती परिणामांची तीव्रता, व्यापकता पडताळून पाहणे, स्थलांतर, मदत व बचाव कार्य, पुनर्वसन व पुनर्रचना इत्यादी आवश्यक आणि उपयुक्त उपायाची अंमलबजावणी म्हणजे आपत्ती व्यवस्थापन होय. आपत्ती निवारण्याची जबाबदारी हे प्रत्येक नागरिकाचे मूलभूत कर्तव्य असल्याचे प्रतिपादन तहसीलदार निलेश पळसकर यांनी केले. जिल्हा आपत्ती व्यवस्थापन प्राधिकरण, राष्ट्रीय आपत्ती प्रतिसाद दल नागपूर व तहसील कार्यालय यांच्या संयुक्त विद्यमाने २१ जून रोजी तहसील कार्यालय वाशिम येथे पूर, विज, आग, रस्ते अपघात, सर्पदंश विषयी आपत्ती व्यवस्थापनाचे एक दिवसीय तालुकास्तरीय प्रशिक्षण आयोजित करण्यात आले. त्यावेळी अध्यक्षस्थानावरून श्री. पळसकर बोलत होते.
मार्गदर्शक जिल्हा आपत्ती व्यवस्थापन अधिकारी शाहू भगत, नायब तहसीलदार श्री नप्ते, राष्ट्रीय आपत्ती प्रतिसाद दल नागपूरचे पोलीस निरीक्षक ब्रिजेशकुमार यादव, सहाय्यक पोलिस उपनिरीक्षक श्री जयस्वाल, तालुका कृषी अधिकारी श्री जावळे, विस्तार अधिकारी श्री लोखंडे, तात्यासाहेब नवघरे आदी उपस्थित होते.
यावेळी श्री .भगत ,ब्रिजेश कुमार यादव, श्री जयस्वाल आदींनी प्रात्यक्षिकासह उपस्थितांना स्थितांना मार्गदर्शन केले.
प्रशिक्षणाला सरपंच, पोलीस पाटील, मंडळ अधिकारी,तलाठी, ग्रामसेवक, कृषी सहाय्यक, विविध विभागाचे कर्मचारी,तहसील कार्यालयाचे कर्मचारी उपस्थित होते.प्रशिक्षण यशस्वीतेसाठी श्री मोरे, श्री खोंड व इतर कर्मचाऱ्यांनी परिश्रम घेतले
