दगडाने डोके ठेचून तरुणाचा खून
संजय निकम
वाळूज महानगर ( त.भा.): डोक्यात दगड मारून तरुणाचा खून केल्याची घटना वडगाव परिसरात शुक्रवारी सकाळी उघडकीस आली. एमआयडीसी वाळूज पोलीस ठाण्याच्या हद्दीत असणाऱ्या साईनगर सिडको ते वडगाव गट नंबरच्या दिशेने जाणाऱ्या मार्गावर, खदानीलगत अंदाजे ३० ते ३५ वर्षीय तरुणाचा रक्ताने माखलेल्या अवस्थेतील मृतदेह सकाळी सात वाजेच्या कारखान्यात शिफ्टसाठी पायी जाणाऱ्या महिलांच्या निदर्शनास आला. घाबरलेल्या महिलांनी फोनकरून ही माहिती त्यांच्या पतीला दिली. बघता बघता माहिती सर्वत्र पसरल्याने सकाळी आठवाजेपर्यंत घटनास्थळी बघ्यांची मोठी गर्दी जमा झाली.
घटनेची माहिती मिळताच स्थानिक पोलीस ठाण्याचे पोलीस निरीक्षक कृष्णा शिंदे, फौजदार संदीप शिंदे विशेष शाखेचे योगेश शेळके, डिबी पथकाचे विलास वैष्णव आदींनी घटनास्थळाची पाहणी केली. मारेकऱ्याने वडगाव गट नंबरच्या दिशेने जाणाऱ्या मार्गावर दगडाने ठेचून खून करत मृतदेह लगतच्या खदान परिसरात फेकून पळ काढला असावा असा प्राथमिक अंदाज पोलिसांनी वर्तविला आहे. विशेष म्हणजे पोलिसांना घटनास्थळावरून मयताची चप्पल जोड व सोबत रक्ताने मखलेली मारेकऱ्याची चप्पल देखील आढळून आली. घटनास्थळी श्वानाला पाचरण करण्यात आले होते. श्वान लगतच्या दगडाच्या ढिगाऱ्या भोवती आणि नंतर मृतदेह परिसरातच घुटमळत होता. घटनेची माहिती मिळाल्यानंतर सहाय्यक पोलीस आयुक्त देशमुख यांनी सुद्धा घटनास्थळी धाव घेऊन पाहणी केली.
घटनास्थळी वडिलांचा आक्रोश
मृतदेहाजवळ कुठल्याही प्रकारचे कागदपत्रे किंवा मोबाईल आढळून आला नाही. यामुळे ओळख पटविण्यात अडचण आली. मृताच्या उजव्या हातावर ‘आई’ असे नाव गोंदलेले दिसून आले. पोलिसांनी सरपंच सुनील काळे व इतर स्थानिकांना बोलावून ओळख पटविण्याचा प्रयत्न केला मात्र यश आले नाही. दरम्यान, मृताच्या नातेवाइकांनी घटनास्थळी धाव घेतली. येथे मृताच्या वडिलांनी मुलाचा मृतदेह असल्याचे सांगत एकाच आक्रोश केला. यावेळी कामगार नेते अशोक निकम यांनी कुटुंबियांचे सांत्वन करत धीर दिला. मृताचे नाव शैलेश विठ्ठल दौंड असे असून तो बजाजनगर येथील रहिवासी असल्याचे पोलिसांनी सांगितले.
घटनास्थळी बघ्यांची गर्दी
खून झाल्याची माहिती संपूर्ण परिसरात वाऱ्यासारखी पसरली त्यामुळे घटना स्थळी शेकडो बघ्यांची जमली होती. पोलीसांना यामुळे तपास कामांत अडथळा निर्माण होत असल्याने शेवटी पोलीसांना गर्दी पांगवावी लागली.
गर्दुल्यांचा अड्डा
या मार्गावर जवळपास अर्धा किलोमीटर परिसरात कुठेही लाईट नाही. याचा फायदा घेत अनेक गर्दुले या ठिकाणी ठाण मांडून असतात. या रात्रीच्या अंधाराचा फायदा घेत याठिकाणी दारू विक्रीचा व्यवसाय एका लोखंडी टपरीतून केला जातो. दारू पिण्यावरून अथवा दारूच्या नशेत हा प्रकार घडला असल्याची शंका नागरिक व्यक्त करीत होते.