स्ट्रीट लाईट, सोलार प्रकल्प आणि स्वच्छतेतील अनियमिततेचा महाभरडा उघड!
जालना – बदनापूर नगरपरिषद प्रशासनावर पुन्हा एकदा गंभीर आरोपांची सरबत्ती झाली आहे. शहरासाठी मंजूर झालेल्या ५ कोटी रुपयांच्या स्ट्रीट लाईट प्रकल्पात मोठ्या प्रमाणात अनियमितता व भ्रष्टाचार झाल्याचा आरोप करण्यात आला आहे. नागरिकांकडून जिल्हाधिकारी जालना यांच्याकडे लेखी तक्रार दाखल करण्यात आली असून, मुख्याधिकारी व संबंधित अधिकाऱ्यांवर चौकशी करून कायदेशीर कारवाई करावी, अशी मागणी करण्यात आली आहे.
तक्रारीनुसार, DPR (Detailed Project Report) प्रमाणे ५० टक्क्यांहून अधिक स्ट्रीट लाईट बसवण्यात आलेलेच नाहीत, तसेच अनेक ठिकाणी लाईट बसवूनही आजवर एकही लाईट कार्यरत नाही.
नगरपरिषदेकडून मात्र बिले अदा करून निकृष्ट दर्जाचे व बोगस कामाचे पैसे काढण्यात आल्याचा आरोप करण्यात आला आहे.
याचबरोबर, सोलार स्ट्रीट लाईट योजनेअंतर्गत जवळपास ३ कोटी रुपयांचा भ्रष्टाचार झाल्याची धक्कादायक माहिती पुढे आली आहे. DPR प्रमाणे न बसवता इतरत्र ठिकाणी लाईट बसवण्यात आले, तसेच काही ठिकाणी उपकरणे गायब झाल्याचे नागरिकांचे म्हणणे आहे.
दरम्यान, शहरातील स्वच्छतेची परिस्थिती अत्यंत भयावह बनली असून रस्ते, नाले, बाजारपेठ परिसरात घाणीचे साम्राज्य आणि दुर्गंधी पसरली आहे. या परिस्थितीत साथीचे रोग पसरण्याचा गंभीर धोका निर्माण झाला आहे.
तक्रारदारांनी सांगितले की, २७ ऑक्टोबर २०२५ रोजी मुख्याधिकाऱ्यांना लेखी तक्रार दिल्यानंतरही कोणतीही कार्यवाही करण्यात आलेली नाही. उपजिल्हाधिकारी यांनी आदेश दिले असतानाही अंमलबजावणी झाली नाही, अशीही नाराजी व्यक्त करण्यात आली आहे.
नागरिकांची मागणी :
“नगरपरिषदेतील भ्रष्टाचाराची चौकशी अॅन्टी करप्शन ब्युरोमार्फत करण्यात यावी आणि जबाबदार अधिकाऱ्यांवर कडक कारवाई व्हावी.”
