बार्शी – सौ. सुवर्णलता गांधी महाविद्यालय, वैराग येथे शुक्रवार रोजी महिला सुरक्षा, सक्षमीकरण व जागरुकता कार्यक्रम तसेच वंदे मातरम या राष्ट्रगीताला दीडशे वर्ष झाल्यामुळे सामूहिक सुरात वंदे मातरम गीत गायन करण्यात आले.
कार्यक्रमाचे अध्यक्ष प्रभारी प्राचार्य एस.एम. देवकर होते. कार्यक्रमाचे प्रमुख पाहुणे प्रा. डॉ. रविराज फुरडे होते. कार्यक्रमाचे समन्वयक प्रा. डॉ . व्ही एम. कदम यांनी सर्व मान्यवरांचा परिचय करुन दिला व औचित्यपूर्ण प्रास्ताविक केले. निर्भया पथकाचे समन्वयक वैराग पोलीस स्टेशनचे कॉन्स्टेबल हेमंत पाडुळे यांनी महिला सुरक्षाविषयक खबरदारी व उपाय यावर मौलिक मार्गदर्शन केले.
मुलींना स्वसंरक्षणाबाबत जागृत केले. तसेच जेव्हा गरज भासेल तेव्हा पोलिसांशी त्वरित संपर्क करण्याचे आवाहन केले. त्यांचे सहकारी कॉन्स्टेबल भाऊसाहेब महानोर यांनीही मौलिक माहिती दिली. प्रा. डॉ. रविराज फुरडे यांनी महिला सुरक्षा, सबलीकरण व जागरुकता या विषयावर अभ्यासपूर्ण माहिती दिली. तसेच समाजात वाढती गुन्हेगारी प्रवृत्ती व महिलावर होणारे अन्याय, अत्याचार थांबविण्यात निर्भया पथकाची भूमिका प्रभावी असल्याचे सांगितले. त्याचबरोबर वंदे मातरम गीतामुळे देशाला स्वातंत्र्य प्राप्तीसाठी बहुमोल प्रेरणा मिळाली, असे उद्गार काढले.
महाविद्यालयातील जेष्ठ प्राध्यापक एम. एन. खरटमोल यांनीही मुलींना सावधगिरीबाबत मार्गदर्शन केले व स्वावलंबनाबाबत जागृत केले. कार्यक्रमाचे आभारही मानले. त्याचबरोबर क्रीडा संचालक प्रा. एम. ए. भुजबळ यांनीही महिला सुरक्षाविषयक मौलिक टिप्स दिल्या.
