छत्रपती संभाजीनगर : इंडियन मेडिकल असोसिएशन (आयएमए) वुमन डॉक्टर विंगतर्फे आयोजित १५ वी राज्यस्तरीय इव्हकॉन २०२५ परिषद छत्रपती संभाजीनगर येथे उत्साहात पार पडली. तीन दिवस चाललेल्या या परिषदेचे उद्घाटन राज्याध्यक्ष डॉ. संतोष कदम यांच्या हस्ते झाले. उद्घाटन सोहळ्यास राज्य सचिव डॉ. अनिल आव्हाड, माजी अध्यक्ष डॉ. शिवकुमार उत्तुरे, आयपीएस डॉ. अपराजिता अग्निहोत्री, जिल्हाध्यक्ष डॉ. अनुपम टाकळकर, सचिव डॉ. योगेश लक्कस आणि महिला डॉक्टर विंगच्या पदाधिकाऱ्यांची उपस्थिती होती.
उद्घाटनप्रसंगी बोलताना डॉ. संतोष कदम म्हणाले, “आयएमए ही डॉक्टरांच्या हक्कांची आणि सुरक्षेची भक्कम ढाल आहे. फलटण येथील महिला डॉक्टरच्या मृत्यू प्रकरणात आयएमएने उभारलेला आवाज संपूर्ण राज्यभर दुमदुमला आणि सरकारला एसआयटी स्थापन करावी लागली. महिला डॉक्टरांवरील अन्याय आयएमए सहन करणार नाही.” त्यांनी राज्यातील २३० शाखा आरोग्य जनजागृती, रक्तदान, पर्यावरण संरक्षण आणि सामाजिक उपक्रम राबवत असल्याचे नमूद केले.
जिल्हाध्यक्ष डॉ. अनुपम टाकळकर म्हणाले, “इव्हकॉनमुळे राज्यभरातील महिला डॉक्टरांना एकत्र येऊन ज्ञान, अनुभव आणि नेतृत्वगुणांची देवाणघेवाण करण्याची संधी मिळते. छत्रपती संभाजीनगर शाखेला या वर्षी यजमानपद मिळणे हा आमच्यासाठी सन्मान आहे.”
मुख्य पाहुण्या आयपीएस डॉ. अपराजिता अग्निहोत्री यांनी महिला डॉक्टर हे समाजातील सर्वांत संवेदनशील आणि जबाबदार घटक असल्याचे सांगत स्वसंरक्षण आणि मानसिक आरोग्य जपण्यावर भर दिला. त्यांनी महिलांविरुद्ध वाढत्या गुन्ह्यांच्या पार्श्वभूमीवर डॉक्टरांनी समाजात जागरूकता निर्माण करण्याचे आवाहन केले.
माजी अध्यक्ष डॉ. शिवकुमार उत्तुरे यांनी आयएमएने डॉक्टरांना व्यावसायिक सुरक्षा दिल्याचे सांगत युवा डॉक्टरांनी मोठ्या प्रमाणावर संघटनेत सहभागी व्हावे, असे आवाहन केले. राज्य सचिव डॉ. अनिल आव्हाड यांनी आयएमएच्या डिजिटलायझेशन, प्रशिक्षण कार्यशाळा आणि युवा डॉक्टरांसाठी तयार करण्यात येत असलेल्या नव्या उपक्रमांची माहिती दिली.
परिषदेदरम्यान राज्यातील पुरग्रस्त भागात सेवा देणाऱ्या डॉक्टरांचा, तसेच पेपर व पोस्टर सादरीकरणात उल्लेखनीय कामगिरी करणाऱ्या सहभागींचा गौरव करण्यात आला.
यावेळी बॉम्बे नर्सिंग होम अॅक्ट ऐवजी महाराष्ट्र नर्सिंग होम अॅक्ट लागू करण्याचा प्रस्ताव शासनाकडे पाठवला असून तो लवकर मंजूर होण्याची अपेक्षा असल्याची माहिती डॉ. कदम यांनी दिली.
