उदगीर / लातूर : महाराष्ट्र लोकसेवा आयोगाच्या (एमपीएससी) परीक्षेत यश मिळवलेल्या दावणगावच्या दोन कन्यांचा ग्रामस्थांच्या वतीने घोड्यावर बसवून भव्य मिरवणूक काढून सत्कार करण्यात आला. या कन्यांनी आपल्या यशाने गावाचे नाव उज्ज्वल केले असून, उदगीरचे उपविभागीय अधिकारी सुशांत शिंदे यांच्या हस्ते त्यांचा सन्मान करण्यात आला.
लोकसेवा आयोगाच्या परीक्षेत विक्रीकर आयुक्त पदी निवड झालेल्या प्रणिता मदन भंडे व एमबीबीएस एम डी झालेल्या डॉ. अक्षता प्रकाश साखरे या दोघींचा सत्कार ग्रामस्थांनी घोड्यावर बसून वाजत गाजत मिरवणूक काढून केला.चक्रधर कालिदास भंडे या पुणे या गावातील यशस्वी उद्योजकाचा सत्कारही प्रमुख पाहुण्यांच्या हस्ते करण्यात आला.यावेळी ज्येष्ठ सामाजिक कार्यकर्ते धनाजी मुळे, प्रा.डॉ. शिवाजी मुळे, ज्ञानेश्वर पाटील, शिक्षक नेते शिवाजीराव साखरे -वाघ सतीश भंडे यांची समयोचित भाषणे झाली.
प्रास्ताविक शिक्षक नेते किशनराव बिरादार यांनी केले. आभार रफिक बागवान यांनी मानले. दावणगाव येथील संत सावतामाळी विद्यालयातही प्रणिता भंडे व अक्षता साखरे या दोघींचा सत्कार करण्यात आला.या कार्यक्रमासाठी संस्थेचे अध्यक्ष बालाजीराव फुले, सचिव तानाजी फुले, प्राचार्य शिवहार रोडगे, चेअरमन विश्वनाथ भंडे यांनी पुढाकार घेतला.
