वैराग – ढोराळे येथील विश्वनाथ भुजंग जाधव यांच्या वस्तीवर बिबट्या सदृश्य हिंस्र प्राण्याने हल्ला करून दीड वर्षाच्या वासरास ठार मारल्याची घटना शुक्रवारी मध्यरात्री घडली आहे. घटनास्थळी वन विभागाने पाहणी केली असून सतर्क राहण्याचा इशारा दिला आहे.
गेल्या दोन दिवसांपासून वैराग भागात बिबट्या किंवा वाघ हे दोन्ही हिंस्र प्राणी वावरत असावेत असा अंदाज व्यक्त करण्यात येत आहे. दरम्यान हिंगणी,सर्जापूर,धामणगाव, इर्ले,सुर्डी या गावातील शिवेवरती हिंस्र प्राण्यांचा वावर आढळून आला होता. अनेक ठिकाणी त्यांच्या पायांचे ठसे देखील आढळून आले आहेत. दरम्यान ढोराळे येथील जाधव यांची वस्ती गावापासून अवघ्या २०० मीटर अंतरावर आहे. त्यांनी शुक्रवारी रात्री दारातील लिंबाच्या झाडाला वासरू बांधले होते.
सकाळी उठल्यानंतर निपचित पडलेले वासरू जवळ जाऊन पाहिले असता मयत असलेले दिसून आले. वासराचा पार्श्वभाग अज्ञात प्राण्याने खाऊन टाकल्याचे दिसले जाधव यांनी तात्काळ ग्रामपंचायत सदस्य राहुल खरात, अमोल शिंदे यांना फोन करून माहिती दिली त्यांनी वन विभागाला घटना कळवली त्यानंतर वन विभागाचे वैराग परिमंडल अधिकारी धनंजय शिदोडकर वनपाल सचिन पुरी यांनी घटनास्थळी भेट देऊन पंचनामा केला. दरम्यान वन विभागाने हा हल्ला बिबट्या सदृश्य प्राण्याचा असू शकतो असा प्राथमिक अंदाज व्यक्त केला असून ग्रामस्थांनी काळजी घेण्याचे आवाहन केले आहे. याशिवाय वन विभागाच्या वतीने देण्यात येणाऱ्या सूचनांचे वेळोवेळी पालन करावे असेही सुचवले आहे.
अवघ्या तीन महिन्यांपूर्वी ढोराळे येथील नेताजी पाटील यांच्या बैलावरती वाघाने हल्ला करून त्यास ठार मारले होते. त्यानंतर पुन्हा जाधव यांच्या वासरा वरती हल्ला करून ठार मारण्याची घटना घडली आहे. यावेळी बिबट्या सदृश्य प्राणी असावा असा अंदाज वन विभागाने व्यक्त केला आहे.
