लातूर : मागच्या तब्बल दोन दशकांपासून पोलीस व न्यायालयाला गुंगारा देण्यात यशस्वी झालेल्या अट्टल गुन्हेगारास लातूर पोलिसांनी शिताफीने पकडले आहे.
लातूर पोलिसांच्या विशेष पथकाने २००४ सालापासून विविध ठिकाणी वास्तव्य बदलत पोलीस आणि न्यायालयास चकवा देणाऱ्या गंभीर गुन्ह्यातील मुख्य आरोपी बालाजी उर्फ बंटी सुधाकर पकाले याला अटक करण्यात यश मिळवले आहे. सदर आरोपीवर सशस्त्र स्वरूपात फिर्यादीला मारहाण करून दरोडा घालणे, जखमी करणे व रोकड-घड्याळाची जबरी लूट केल्याचा गंभीर गुन्हा दाखल होता. या प्रकरणी लातूरच्या गांधी चौक पोलीस ठाण्यात गुन्हा दाखल होताच आरोपी सतत वास्तव्य व ओळख लपविण्यासाठी वेगवेगळी नावे वापरून पोलीस समन्स, वॉरंट टाळण्यासाठी गायब राहुन न्यायालयीन कारवाईत गैरहजर राहुन पोलीस यंत्रणेला दीर्घकाळ चकवा देत होता. त्यामुळे हा गुन्हा अनेक वर्षे “डारमंड फाईल” म्हणून वर्गीकृत ठेवण्यात आला होता.
अलीकडे लातूर पोलिसांच्या विशेष पथकास विश्वसनीय माहिती मिळाली की, सदरचा आरोपी गरुड चौक – रिंग रोड परिसरातील महादेव नगर भागात नाव बदलून राहत आहे. त्यावरून विशेष पथकाने तात्काळ गुप्त चौकशी करत माहिती संकलित केली. वेगवेगळ्या पत्त्यावरून मिळणाऱ्या हालचालींची पडताळणी करून पथकास आरोपी तेथेच वास्तव्यास असल्याचे स्पष्ट झाल्यावर विशेष पथकाने दि. २८ नोव्हेंबर २०२५ रोजी आरोपीस ताब्यात घेऊन पोलीस स्टेशन गांधी चौक यांच्याकडे पुढील कार्यवाहीस्तव देण्यात आले.
आरोपीला मुख्य न्यायदंडाधिकारी एस. एन. पाटील यांच्या न्यायालयात सादर करण्यात आले असता दोन्ही बाजूंची सुनावणी करून न्यायालयाने आरोपीस दि. १२ डिसेंबर २०२५ पर्यंत न्यायालयीन कोठडी सुनावली आहे. सदरची कारवाई पोलीस अधीक्षक अमोल तांबे, अपर पोलीस अधीक्षक मंगेश चव्हाण, उपविभागीय पोलीस अधिकारी लातूर शहर, समीरसिंह साळवे यांच्या मार्गदर्शनाखाली विशेष पथकातील पोलीस उपनिरीक्षक संजय भोसले, पोलीस अंमलदार दत्तात्रय शिंदे, योगेश गायकवाड, श्रीकांत कुंभार यांनी केली आहे.
