सोलापूर – फॅमिली प्लॅनिंग असोसिएशन ऑफ इंडिया, सोलापूर शाखा आणि वालचंद कॉलेज ऑफ आर्ट्स अ‍ॅण्ड सायन्स यांच्या संयुक्त विद्यमाने आज मोफत हिमोग्लोबिन तपासणी शिबिराचे आयोजन करण्यात आले. या शिबिरामध्ये जवळपास 190 हून अधिक मुलींची मोफत तपासणी करण्यात आली.
इयत्ता ११ वी व १२ वीतील 17 ते 19 वयोगटातील मुलींनी या शिबिरात सहभाग घेतला. तपासणीदरम्यान ज्यांच्या हिमोग्लोबिनचे प्रमाण कमी आढळले त्या मुलींना आहारातील आवश्यक बदल, डाएट, पोषक पदार्थ, तसेच किशोरवयातील आरोग्य समस्या व त्यावरील उपाययोजना याबाबत मार्गदर्शन डॉ. कविता चंडक यांनी केले. योग्य खाण्यापिण्याच्या सवयी तसेच शरीराला आवश्यक पोषक घटकांविषयी त्यांनी सविस्तर माहिती दिली.
शिबिरासाठी फॅमिली प्लॅनिंग असोसिएशनचे शाखा मॅनेजर श्री. सुगतरत्न गायकवाड, सिस्टर सौ. आशालता मस्के व लॅब टेक्निशियन सौ. प्रीती चौधरी यांनी महत्त्वपूर्ण भूमिका बजावली. समाजसेविका सौ. कल्पना गडगडे व श्री. आकाश गायकवाड यांनी सर्व मुलींची तपासणी सुरळीत पार पाडण्यासाठी विशेष मेहनत घेतली.
कार्यक्रमास वालचंद कॉलेजचे प्राचार्य डॉ. संतोष कोटी, उपप्राचार्य श्री. अनुप म्हेत्रे, पर्यवेक्षक डॉ. जीवराज कस्तुरे तसेच प्राध्यापिका डॉ. विजया महाजन आणि डॉ. निशा वाघमारे उपस्थित होते. शिबिर यशस्वी करण्यासाठी सौ. विजया तडकल व शिल्पा डोळस यांनी परिश्रम घेतले.
कार्यक्रमाची सुरुवात स्वागत व सत्कार समारंभाने झाली. शिबिरात बहुतांश मुलींनी उत्स्फूर्त सहभाग नोंदवून कार्यक्रम यशस्वी केला.
