पंढरपूर – पंढरपूर तालुका पोलिसांकडून ३१ डिसेंबरच्या अनुषंगाने तालुक्यात ठीक ठिकाणी नाकाबंदी करुन तसेच वाहनांची कसून तपासणी करण्याची मोहिम हाती घेतली असल्याची माहिती तालुका पोलिस ठाण्याचे वरिष्ठ पोलिस निरीक्षक टी.वाय.मुजावर यांनी दिली.
या विशेष मोहिमे संदर्भात माहिती देताना पोलिस निरीक्षक मुजावर यांनी सांगितले की,पोलीस अधीक्षक अतुल कुलकर्णी, अप्पर पोलीस अधीक्षक प्रितम यावलकर, येथील उपविभागीय पोलीस अधिकारी प्रशांत डगळे यांनी दिलेल्या सूचनाप्रमाणे पंढरपूर तालुका पोलीस ठाणे हद्दीत ३१ डिसेंबरच्या अनुषंगाने बुधवारी पंढरपूर तालुका पोलिसांनी कासेगाव रोड, मोहोळ सोलापूर रोड त्याचप्रमाणे टेंभुर्णी पंढरपूर रोड या ठिकाणी नाकाबंदी सुरू केलेली आहे.
दरम्यान अपघात होऊ नये किंवा अपघातामुळे जीवित हानी होऊ नये यासाठी उपाययोजना म्हणून पंढरपूर तालुका पोलिसांनी दारू पिऊन वाहन चालवणाऱ्या चालकाच्या विरोधात गुन्हे दाखल केलेले असून ब्रेथ अनालायझर मशीनच्या द्वारे दारू पिऊन वाहन चालवणाऱ्या वाहन चालकाची कसून तपासणी करण्यात येत आहे. जेणेकरून ३१ डिसेंबरच्या अनुषंगाने कुठलेही अपघात होऊ नये म्हणून पंढरपूर तालुका पोलिसांकडून उपायोजना करण्यात येत आहे. त्याचप्रमाणे हॉटेल, धाबे आणि लॉजेस या ठिकाणी पोलिसांनी साध्या गणवेशात अधिकारी आणि पोलिसांना नेमले असल्याचे देखील सांगण्यात आले.
———————
तालुका पोलिसांकडून आवाहन
सर्व नागरिकांना याद्वारे आवाहन करण्यात येते की नागरिकांनी ३१ डिसेंबरचा आनंद आपल्या घरामध्ये सुद्धा सुरक्षिततेत राहून साजरा करावा कुठलेही नशा किंवा कुठल्याही अमली पदार्थ सेवन करू नये व सुरक्षितपणे ३१ डिसेंबरचा दिवस साजरा करावा असे सर्वांना पंढरपूर तालुका पोलीस स्टेशनच्या वतीने आवाहन करण्यात येत असल्याचे देखील तालुका पोलिस ठाण्याचे वरिष्ठ पोलिस निरीक्षक टी.वाय.मुजावर यांनी सांगितले. .
