बार्शी – भाई उद्धवराव पाटील शासकीय औद्योगिक प्रशिक्षण संस्था, धाराशिव येथील कोपा व्यवसायातील प्रशिक्षणार्थींनी सादर केलेल्या इलेक्ट्रॉनिक अल्बम ई-फंक्शन मॅनेजमेंट सिस्टीम या नाविन्यपूर्ण प्रकल्पास तालुकास्तरीय व जिल्हास्तरीय तंत्र प्रदर्शनामध्ये बिगर अभियांत्रिकी प्रवर्गात प्रथम क्रमांक प्राप्त झाला आहे. टाटा स्ट्राईव्ह प्रकल्पांतर्गत टाटा कंपनीकडून या प्रकल्पास विशेष प्राविण्यता प्रमाणपत्र प्रदान करण्यात आले.
हा प्रकल्प रुपामाता परिवार यांच्या सौजन्याने प्रायोजित असून, आधुनिक डिजिटल तंत्रज्ञानाच्या माध्यमातून समाजोपयोगी गरजांची पूर्तता करणारा असल्याने मान्यवरांकडून विशेष प्रशंसा करण्यात आली.
या प्रकल्पामध्ये प्रशिक्षणार्थी आयान शेख, गणेश रोटे, सुरज सोनटक्के व रितेश ढगे यांनी सहभाग नोंदविला असून, त्यांना संस्थेचे शिल्प निदेशक (कोपा) डॉ. किरण प्रकाश झरकर यांनी मार्गदर्शन केले.
या यशाबद्दल कौशल्य विकास केंद्राचे सहाय्यक आयुक्त संजय गुरव, जिल्हा व्यवसाय शिक्षण व प्रशिक्षण अधिकारी प्रवीण औताडे यांच्यासह आयएमसी सदस्य व विविध औद्योगिक क्षेत्रातील मान्यवरांच्या हस्ते पारितोषिक वितरण करण्यात आले.
सदर प्रकल्पाच्या माध्यमातून कोणत्याही कार्यक्रमाशी संबंधित फोटो, व्हिडिओ, पीडीएफ, बातम्या व निमंत्रण पत्रिका एका लिंकद्वारे वेब पोर्टल स्वरुपात उपलब्ध होतात. यामुळे माहिती तात्काळ मिळते, मोबाईल मेमरी वाचते व जुन्या आठवणी जतन करणे सुलभ होते.
या तंत्र प्रदर्शनातून प्रकल्पास तीन नव्या ऑर्डर प्राप्त झाल्या असून, हा प्रकल्प विभागस्तरीय तंत्र प्रदर्शनासाठी निवडण्यात आला आहे. भविष्यात हा प्रकल्प अधिक व्यापक स्वरुपात विकसित होईल, अशी अपेक्षा व्यक्त करण्यात आली आहे.
