सोलापूर – कॅन्सरग्रस्त रुग्णांसाठी अनेक वर्षांपासून सेवाभावी कार्य करणाऱ्या सोलापूर कॅन्सर सोसायटीच्या इमारतीचे संपूर्ण नूतनीकरण प्रिसिजन कॅमशाफ्ट्स लिमिटेडच्या CSR (कॉर्पोरेट सोशल रिस्पॉन्सिबिलिटी) निधीतून नुकतेच यशस्वीरीत्या पूर्ण करण्यात आले. या नूतनीकरणामुळे संस्थेच्या रुग्णसेवेला नवी दिशा मिळणार असून रुग्णांसाठी अधिक सुरक्षित, स्वच्छ व सोयीस्कर सुविधा उपलब्ध होणार आहेत.
बुधवारी (दि. ४) नूतनीकरणानिमित्त सोसायटीच्या नूतन इमारतीत विशेष कार्यक्रमाचे आयोजन करण्यात आले होते. कार्यक्रमाच्या सुरुवातीला सोलापूर कॅन्सर सोसायटीच्या माजी सचिव कै. सुशीला पाटील यांच्या प्रतिमेला पुष्पहार अर्पण करून त्यांना आदरांजली वाहण्यात आली. या कार्यक्रमास प्रिसिजनचे चेअरमन व व्यवस्थापकीय संचालक श्री. यतिन शहा, सोलापूर कॅन्सर सोसायटीचे व्हॉइस चेअरमन डॉ. अरविंद देखणे, खजिनदार श्री. उत्तमराव डोईजोडे, मानद सचिव डॉ. व्यंकटेश मेतन, डॉ. शिरीष कुमठेकर यांच्यासह संस्थेचे सदस्य, डॉक्टर्स व मान्यवर मोठ्या संख्येने उपस्थित होते.
वैद्यकीय उपचारांमुळे कॅन्सर होऊ शकतो बरा – डॉ. कुमठेकर
कार्यक्रमाचे प्रास्ताविक डॉ. शिरीष कुमठेकर यांनी केले. संस्थेची इमारत संरचनात्मकदृष्ट्या मजबूत असली तरी कालांतराने ती जीर्णावस्थेत गेली होती. रुग्णांची सुरक्षितता, सोय आणि स्वच्छतेच्या दृष्टीने नूतनीकरण अत्यावश्यक झाले होते. या संदर्भात डॉ. सुहासिनी शहा आणि श्री. यतिन शहा यांच्याशी चर्चा केल्यानंतर त्यांनी कोणताही विलंब न करता संपूर्ण इमारतीचे नूतनीकरण करून देण्याची तयारी दर्शवली. त्यांच्या सहकार्यामुळे आज ही इमारत नव्या स्वरूपात उभी राहिल्याचे डॉ. कुमठेकर यांनी सांगितले. कॅन्सरविषयी जनजागृतीचे महत्त्व अधोरेखित करताना ते म्हणाले की, आजच्या वैद्यकीय प्रगतीमुळे सुमारे ६० टक्के कॅन्सर बरा होऊ शकतो. मात्र यासाठी वेळेवर निदान आणि जनजागृती अत्यंत महत्त्वाची आहे. ४ फेब्रुवारी हा जागतिक कॅन्सर दिन म्हणून साजरा केला जातो, असेही त्यांनी नमूद केले.
समाजोपयोगी उपक्रमांना प्रिसिजनचे सातत्यपूर्ण सहकार्य- डॉ. शहा
यावेळी मनोगत व्यक्त करताना प्रिसिजन फाउंडेशनच्या अध्यक्षा डॉ. सुहासिनी शहा म्हणाल्या की, इमारतीची अवस्था अतिशय खराब झाली होती आणि त्यामुळे रुग्णसेवेत अडथळे येत होते. म्हणूनच नूतनीकरण अपरिहार्य होते. प्रिसिजन कॅमशाफ्ट्स लिमिटेडने यापूर्वीही आरोग्य व शिक्षण क्षेत्रात भरीव योगदान दिले असून भविष्यातही समाजोपयोगी उपक्रमांना सातत्याने सहकार्य करत राहील, असा विश्वास त्यांनी व्यक्त केला.
गरजूंसाठी कॅन्सर सोसायटी ठरते आधारस्तंभ –
सोलापूर कॅन्सर सोसायटीमध्ये कॅन्सरग्रस्त रुग्णांची नियमित सुश्रुषा केली जाते. अनेक रुग्णांना घरच्या घरी योग्य उपचार व देखभाल मिळत नाही, तसेच आर्थिक परिस्थितीमुळे औषधोपचारांचा खर्च परवडत नाही. अशा गरजू व गरीब रुग्णांसाठी ही संस्था आधारस्तंभ ठरत आहे. इमारतीचे नूतनीकरण पूर्ण झाल्यामुळे आता रुग्णसेवा अधिक प्रभावी व सुरक्षित पद्धतीने करता येणार आहे. विशेष म्हणजे ही संस्था पूर्णतः देणग्यांवर चालत असून कोणतेही शासकीय अनुदान संस्थेला मिळत नाही.
कार्यक्रमाच्या शेवटी संस्थेचे मानद सचिव डॉ. व्यंकटेश मेतन यांनी सर्वांचे आभार मानले.
