सोलापूर – दक्षिण सोलापूर तालुक्यातील कासेगाव येथील दगड खाणीच्या पाण्यात बुडालेल्या श्रीहर्ष उर्फ यश श्रीहरी हब्बू या चौथीतील विद्यार्थ्याचा शोध तिसऱ्या दिवशीही लागलेला नाही. गुरुवारी (दि.१२) मार्च दुपारी घडलेल्या या दुर्दैवी घटनेनंतर सुरू असलेली शोधमोहीम शनिवारी सकाळपर्यंत सुरू असली तरी यशचा अद्यापही ठावठिकाणा लागलेला नव्हता.
प्राप्त माहितीनुसार, कासेगाव येथील जिल्हा परिषद शाळेत चौथीमध्ये शिकणारा यश हा गुरुवारी दुपारी पोहण्यासाठी आपल्या काका व त्यांच्या मित्रांसोबत कासेगाव हद्दीतील ब्रह्मनाथ मंदिर परिसरातील दगड खाण येथे गेला होता. यशला काठावर बसवून इतरजण पोहण्यासाठी थोड्या अंतरावर गेले असताना काठावर बसलेला यश अचानक पाण्यात पडून बुडाल्याची घटना घडली.
दरम्यान, घटनेनंतर सुरुवातीला स्थानिकांनी पाण्यात उतरून त्याचा शोध घेण्याचा प्रयत्न केला; मात्र त्यात यश सापडला नाही. त्यानंतर तातडीने अग्निशमन दलाला माहिती देण्यात आली. या घटनेनंतर आपत्ती व्यवस्थापन अधिकारी शक्तीसागर ढोले यांच्या मार्गदर्शनाखाली गुरुवारपासून शोधमोहीम सुरू आहे. घटनास्थळी पोलीस उपनिरीक्षक घोडके, पोलीस निरीक्षक देशपांडे, डब्ल्यू.पी.एस.आय. डोंगरीतोट, सुपे मॅडम, तलाठी हुडेवाले, सर्कल अधिकारी माळी तसेच तहसीलदार किरण जगदाडे यांनी भेट देऊन परिस्थितीची पाहणी केली. कासेगावचे सरपंच यशपाल वाडकर व एएसआय बाणेवाले आदीं घटनास्थळी उपस्थित होते.
यशच्या शोधासाठी आपत्ती व्यवस्थापन अधिकारी ढोले यांच्यासह अग्निशमन दलाचे केंद्र अधिकारी रावसाहेब मगर, चालक मिलिंद सुरवसे, फायरमन सचिन लोकरे, राजू चिंता, संकेत कुंभार आणि महेश गेंड हे पाण्यात उतरून प्रयत्न करत आहेत. तसेच स्थानिक ओंकार भोजने व सचिन गरड यांच्या कॅमेऱ्यांच्या मदतीनेही पाण्यात शोध घेण्याचा प्रयत्न करण्यात आला.
दरम्यान, शनिवारी सकाळपासून बोटीच्या मदतीने पुन्हा शोधमोहीम राबविण्यात आल्याचे दिसून आले. पाण्यात खोलवर गळ सोडूनही शोध घेण्यात येत असून उपलब्ध सर्व शक्यता तपासून यशचा शोध सुरू असल्याचे प्रशासनाकडून सांगण्यात आले.
५५ मेगा पिक्सेल कॅमेरेच्या माध्यमातून शोध मोहीम सुरू
आपत्ती व्यवस्थापन विभागाकडील ५५ मेगा पिक्सेल उच्च क्षमतेचा कॅमेरा सुमारे ८० ते १०० फूट खोलवर सोडून तपासणी करण्यात आली. गेल्या दोन दिवसांपासून सकाळ ते सायंकाळपर्यंत शोधकार्य सुरू असूनही यशचा शोध लागलेला नाही.
