सोलापूर : जिल्हा विधी सेवा प्राधिकरण यांच्या मार्फत महापालिका प्रशासनाने महापालिका आवारात आयोजित केलेल्या लोकअदालतचा सुमारे 2 हजार मिळकतदारांनी लाभ घेतला. यामुळे महापालिकेच्या तिजोरीत एका दिवसात तब्बल 5 कोटी रुपये कर जमा झाला आहे. त्यास चांगला प्रतिसाद मिळाला.
सोलापूर जिल्हा विधी सेवा प्राधिकरणयांच्यामार्फत राष्ट्रीय लोक अदालतीचे शनिवारी आयोजन करण्यात आले होते. या लोक अदालतीमध्ये मालमत्ता कर विभागाकडून सुमारे 10 हजार मिळकतदारांची प्रकरणे तडजोडी करीता दाखल करण्यात आलेली आहेत. दाखल प्रकरणनिहाय जिल्हा विधी सेवा प्राधिकरण सचिव यांच्या मार्फत संबंधित मिळकतदारांना नोटीसा बजावण्यात आल्या होत्या. लोक अदालतमध्ये मिळकतदारांच्या थकबाकीतील नोटीस फि, वॉरंट फि व शास्ती ची जी रक्कम आहे त्यामधील ५० टक्के रक्कम सुट देण्यात येत आहे.
दरम्यान, आयुक्त डॉ. सचिन ओम्बासे यांच्या मार्गदर्शनाखाली आणि उपायुक्त आशिष लोकरे यांच्या नियंत्रणाखाली सकाळी १० ते सायंकाळी ६ वाजेपर्यंत लोकअदालतीचे आयोजन करण्यात आले होते. या लोकअदालतीच्या माध्यमातून मिळकतकर थकबाकीदारांना शास्तीमध्ये ५० टक्के सवलत देण्यात आली असल्याची माहिती उपायुक्त आशिष लोकरे यांनी दिली. लोकअदालतीसाठी दिवाणी व फौजदारी न्यायाधीश (कनिष्ठ स्तर) एस. पी. पाटील तसेच लोकअभिरक्षक ॲड. रेवण पाटील उपस्थित होते. यावेळी उपायुक्त आशिष लोकरे यांनी त्यांचे पुष्पगुच्छ देऊन स्वागत केले. त्यानंतर न्यायाधीश एस. पी. पाटील, ॲड. रेवण पाटील आणि उपायुक्त आशिष लोकरे यांनी मिळकतकर विभागाला भेट देत पेठनिहाय माहिती घेतली. पालिका कर्मचाऱ्यांशी थकीत मिळकतकराबाबत चर्चा केली.यावेळी कर भरण्यासाठी आलेल्या नागरिकांचीही भेट घेण्यात आली. कर भरण्याबाबत मार्गदर्शन करण्यात आले.
या लोक आदालतीत मिळकत कर थकबाकीदारांकडून ऑनलाईन आणि रोख स्वरूपात 3 कोटी 93 लाख रुपये कर भरणा करण्यात आला. तर धनादेशाद्वारे सुमारे 64 लाख रुपये कर भरणा झाला. चेक आणि ऑनलाईन व रोख असे सर्व मिळून अंदाजे 5 कोटी रुपये थकीत मिळकत कर जमा झाला आहे. मिळकत कर विभागाचे अधीक्षक युवराज गाडेकर यांच्या माध्यमातून 24 कर निरीक्षक, 65 लिपिक कर्मचारी या अदालतीसाठी कार्यरत होते.
नागरिकांनी स्वयंस्फूर्तीने कर भरावा : उपायुक्त आशिष लोकरे
यंदाच्या आर्थिक वर्षासाठी कर आकारणी व कर संकलन विभागाला ३१८ कोटी रुपयांचे उद्दिष्ट देण्यात आले असून आतापर्यंत सुमारे २१० कोटी रुपयांची वसुली करण्यात आली आहे. उर्वरित रक्कम वसूल करण्यासाठी तसेच पालिकेचे उत्पन्न वाढविण्यासाठी प्रशासनाकडून विशेष मोहीम राबविण्यात येत आहे. विविध प्रकारच्या कारवाया प्रशासनाकडून करण्यात येत आहेत. त्यामुळे नागरिकांनी स्वयंस्फूर्तीने कर भरावा, असे आवाहनही महापालिका उपायुक्त आशिष लोकरे यांनी केले आहे.
