छत्रपती संभाजीनगर – जिल्ह्यातील अनेक शहरांत व्यावसायिक गॅससह एमआयडीसीमध्ये गॅसचा पुरवठा बंद झाल्याचा फटका बसू लागला आहे. हॉटेल चालकांनी सिलिंडरच्या तुटवड्याला पर्यायी मार्ग शोधला आहे. अनेकांनी विद्युत शेगडीसह चुलीचा आधार घेतला आहे. विद्युत शेगडीची मागणी वाढली असल्याने तिचे भावही काही ठिकाणी विक्रेत्यांनी वाढवल्याचे दिसून आले.
पैठणधील उद्योग क्षेत्रातील कॅटीनलाही सिलिंडरच्या तुटवड्याचा मोठा फटका बसला आहे. अनेक हॉटेलमध्ये आता गॅस नसल्याने विद्युत शेगडीवर चहासह इतर पदार्थ करावे लागत आहेत. हॉटेलमधील मटणासह जड पदार्थांचे दर काही प्रमाणात वाढले आहेत, तर पैठण एमआयडीसीमधील अनेक कंपन्यांमधील कँटीन बंद कराव्या लागल्या आहेत. व्यावसायिक गॅस सिलिंडरचा पुरवठा मागील काही दिवसांपासून बंद असल्याने व्यावसायिक ग्राहकांना मोठ्या अडचणी येत आहेत. दरम्यान, गॅसच्या किमतीतही वाढ झाली आहे. घरगुती गॅसच्या दरात सुमारे ६० रुपयांची वाढ झाली असून व्यावसायिक गॅस सिलिंडरच्या दरात सुमारे ११५ रुपयांची वाढ झाली आहे. घरगुती गॅस सिलिंडरचा काही प्रमाणात व्यावसायिक वापर होत असल्याचे चित्र समोर येत आहे. अनेक हॉटेल्स, मेस व खानावळींमध्ये व्यावसायिक गॅसऐवजी घरगुती सिलिंडरचा वापर होत असल्याने सामान्य नागरिकांना गॅस मिळवण्यासाठी एजन्सीसमोर रांगा लावाव्या लागत आहेत. अनेक दुकानदारांनी शेगड्या उपलब्ध नसल्याचा बहाणा करत चढ्या भावाने शेगड्यांची विक्री सुरू केली आहे. पूर्वी अनेक हॉटेल व्यावसायिक घरगुती गॅसचा वापर करून आपला व्यवसाय करत होते. आता घरगुती गॅस हॉटेलवर सापडला तर कडक कारवाई होईल, या भीतीने अनेक चहा, नाष्ट्याचे हॉटेल बंद झाले आहेत. खुलताबादला हॉटेल चालकांनी यापूर्वीच व्यावसायिक गॅस सिलिंडरचा एक लॉट खरेदी करून साठा करून ठेवल्याने सध्या कोणतेही हॉटेल बंद पडलेले नाही. बहुतेक सर्व हॉटेल्स नियमितपणे सुरू आहेत. कोणताही मेनू बंद करण्यात आलेला नाही. गंगापूर व परिसरातील काही हॉटेल व्यावसायिकांकडे आणखी तीन चार दिवस पुरेल एवढा गॅस शिल्लक आहे. ज्यांचा संपला, त्यापैकी बहुतांश हॉटेल चालकांनी लाकडी चुलीवर मेन्यू बनवणे सुरू केले आहे. काहींनी डिझेल शेगड्या वापरणार असल्याचे सांगितले.
गॅसच्या तुटवड्यामुळे हॉटेलमधील खाद्यपदार्थांच्या किंमतीमध्येही व्यावसायिक वाढ करत असल्याचे निदर्शनास येत आहे. त्याचा फटका सामान्य ग्राहकांना बसत आहे. गरजू ग्राहकांना ही दरवाढ सहन करण्याशिवाय तूर्तास कोणताही पर्याय नसल्याचेही पाहावयास मिळत आहे.
