सोलापूर – पुण्यश्लोक अहिल्यादेवी होळकर सोलापूर विद्यापीठाच्या क्रीडा व शारीरिक शिक्षण मंडळामध्ये (Board of Sports) विविध क्रीडा क्षेत्रातील विश्वसनियता सिद्ध केलेले, कुलगुरूंनी नामनिर्देशित केलेले तीन व्यावसायिक प्रतिनिधी नियुक्त करताना नियमाचा चुकीचा अर्थ काढत तत्कालीन व विद्यमान कुलगुरूंनी या मंडळावर शारीरिक शिक्षण संचालकाची नियुक्ती केल्याचे समोर आले आहे.
महाराष्ट्र विद्यापीठ कायदा तयार करताना क्रीडा व शारीरिक शिक्षण मंडळामध्ये (Board of Sports) सर्व समावेशक क्रीडा क्षेत्रातील तज्ञ व्यक्तीचा समावेश असावा, याचा विचार हा कायदा तयार करणाऱ्या समितीने केला होता. जेणेकरून विद्यापीठाच्या क्रीडा विकासास गती मिळेल.
महाराष्ट्र विद्यापीठ कायद्यातील
57 2 (c) three professionals, nominated by the Vice-Chancellor with established
credibility in different fields of sports; या तरतुदीनुसार क्रीडा क्षेत्रातील तज्ञ व्यावसायिक व्यक्तीच्या नियुक्ती कराव्यात, असे अपेक्षित आहे. परंतु सोलापूर विद्यापीठाने या नियमाचा चुकीचा अर्थ काढत तत्कालीन कुलगुरू प्रा. डॉ. मृणालिनी फडणवीस यांनी या अगोदर २ शारीरिक शिक्षण संचालकाची आणि नंतर विद्यमान कुलगुरू प्रा. डॉ. प्रकाश महानवर यांनीही नुकतेच नियुक्त केलेले एक, हे तिन्हीही व्यक्ती शारीरिक शिक्षण संचालकच आहेत.
महाराष्ट्र विद्यापीठ कायद्यातील 57 2 (f) two sports teachers, from affiliated, conducted or autonomous colleges,
nominated by the Management Council; नुसार महाविद्यालयातील दोन क्रीडा अध्यापक या मंडळावर आहेत. हे या मंडळावर असताना कुलगुरूंनी परत शारीरिक शिक्षण संचालकाची नियुक्ती केली आहे. सद्यस्थितीत या मंडळावर 57 2 (c) नुसार एकही व्यावसायिक क्रीडा तज्ञ व्यक्ती नियुक्त नाही. त्यामुळे क्रीडा अध्यापक वगळता क्रीडा क्षेत्रातील सोलापूर शहर व जिल्ह्यातील अनेक व्यावसायिक क्रीडा तज्ञ व्यक्तींच्या सल्ल्यापासून विद्यापीठाचे क्रीडा व शारीरिक शिक्षण मंडळ वंचित राहिले आहे.
——-
क्रीडा मंडळावर विविध व्यावसायिक तज्ञांची गरज
याबाबत सिनेट सदस्य अजितकुमार संगवे यांनी ४ मार्च २०२६ च्या पत्राने कुलगुरूंचे लक्ष वेधले होते. तसेच मीही हा मुद्दा व्यवस्थापन परिषदेमध्ये उपस्थित केला होता. परंतु नियमाचा वेगळा अर्थ काढत कुलगुरूनी शारीरिक शिक्षण संचालक हे क्रीडा तज्ञच आहेत, असे म्हटले आहे. 2019 पूर्वी 32 लाख रुपये वार्षिक अंदाजपत्रक असलेल्या क्रीडा विभागात मागील तीन वर्षापासून एक कोटीपेक्षा अधिक तरतूद खेळाडू व क्रीडा विकासासाठी केली आहे. मात्र सोलापूर जिल्ह्यात असणाऱ्या गुणवंत खेळाडूंवर लक्ष ठेवून राष्ट्रीय व आंतरराष्ट्रीय स्तराचे मार्गदर्शक बोलावून प्रशिक्षण शिबिर आयोजित करणे तसेच मार्गदर्शकांसाठी मार्गदर्शन व चर्चासत्राचे आयोजन करणे अपेक्षित होते. असे झाले असते तर राष्ट्रीय स्तरावर विद्यापीठाचे गुणांकन वाढलेले दिसून आले असते. यासाठी क्रीडा क्षेत्रातील विविध व्यावसायिक तज्ञ या मंडळावर असणे गरजेचे आहे. त्याबाबत मी कुलगुरूकडे पाठपुरावा करीत आहे.
– प्रा. सचिन गायकवाड, विद्यापीठ व्यवस्थापन परिषद सदस्य
——–
पुणे विद्यापीठात व्यावसायिक क्रीडा तज्ञांना स्थान
महाराष्ट्रातील बहुतांश विद्यापीठाच्या कुलगुरूंनी 57 2 (c) नुसार शारीरिक शिक्षण संचालकाची नियुक्ती न करता शिवछत्रपती क्रीडा पुरस्कार विजेते खेळाडू, क्रीडा संघटक आणि ज्येष्ठ आंतरराष्ट्रीय खेळाडूंना या मंडळावर स्थान दिले आहे. राज्यातील शैक्षणिक व क्रीडा क्षेत्रात अव्वल असलेल्या सावित्रीबाई फुले पुणे विद्यापीठाने या मंडळावर मनोज एरंडे (जलतरण), निर्मल थोरात (खो खो, दोघे शिवछत्रपती क्रीडा पुरस्कारप्राप्त) आणि गायत्री मडकेकर (आंतरराष्ट्रीय बॅडमिंटन खेळाडू) या तीन व्यावसायिक क्रीडा तज्ञांना स्थान दिले आहे.
