सोलापूर – मुंबई, पुणे, अहमदाबाद व सांगली येथे आयोजित विविध राष्ट्रीय व आंतरराष्ट्रीय गुणांकन बुद्धिबळ स्पर्धांमध्ये फिडे मास्टर विरेश शरणार्थी व आंतरराष्ट्रीय गुणांकन प्राप्त मानस गायकवाड यांनी उत्कृष्ट कामगिरी करत उल्लेखनीय यश संपादन केले. विविध बुद्धिबळ स्पर्धांमध्ये विरेशने नेत्रदीपक खेळ करत एकूण रु. १ लाख ५३ हजारांची रोख पारितोषिके व आकर्षक चषक पटकावले तर मानसनेही सातत्यपूर्ण व चमकदार खेळाच्या जोरावर रु. १ लाख २९ हजारांची रोख पारितोषिके व आकर्षक चषक आपल्या नावावर केले.
मुंबई येथे काल संपन्न झालेल्या रमाबाई रानडे फिडे क्लासिकल रेटिंग बुद्धिबळ स्पर्धेत सुरुवातीपासून आक्रमक खेळ करणाऱ्या वीरेशने आपल्या बुद्धीचातुर्य व तांत्रिक कौशल्याच्या बळावर आंतरराष्ट्रीय मास्टरसह अनेक नामांकित खेळाडूंवर मात केली. अकरा पैकी दहा गुणांची कमाई करत त्याने स्पर्धेत निर्विवाद वर्चस्व राखत विजेतेपद पटकावले. यासाठी त्याला रु. ५० हजारांचे रोख पारितोषिक व आकर्षक चषक प्रदान करण्यात आला.
तसेच अहमदाबाद येथे झालेल्या १७ वर्षांखालील राष्ट्रीय अजिंक्यपद बुद्धिबळ स्पर्धेत वीरेशने पाचवा क्रमांक मिळवत रु. ३८ हजारांचे पारितोषिक पटकावले. याच ठिकाणी झालेल्या रॅपिड बुद्धिबळ स्पर्धेत त्याने द्वितीय क्रमांक मिळवत रु. ३० हजारांचे पारितोषिक मिळविले. आरसीपीपी ब्लिट्झ रेटिंग बुद्धिबळ स्पर्धेतही वीरेशने दमदार कामगिरी करत अंतिम फेरीत पश्चिम बंगालच्या आंतरराष्ट्रीय मास्टर श्रीजीत पॉल याचा पराभव केला. नऊ पैकी आठ गुण मिळवत त्याने विजेतेपदासह रु. २० हजारांचे रोख पारितोषिक व आकर्षक चषक पटकावला.
पुणे येथे नुकत्याच संपन्न झालेल्या चेस मॉन्क सीझन-१ स्पर्धेत मानस गायकवाड याने उत्कृष्ट खेळाचे प्रदर्शन करत अतिशय चुरशीच्या झालेल्या स्पर्धेत नऊ पैकी सात गुणांची कमाई केली. या दमदार कामगिरीच्या जोरावर त्याने विजेतेपद पटकावत रु. ७० हजारांचे रोख पारितोषिक व आकर्षक चषक मिळविला.
तसेच पुण्यातील ब्लिट्झ व रॅपिड स्पर्धेत मानसने सहावा क्रमांक मिळवत रु. ६ हजारांचे पारितोषिक पटकावले. ब्लिट्झ स्पर्धेत उपविजेतेपद मिळवत रु. १० हजारांचे पारितोषिक मिळविले. सांगली येथील सुरज आंतरराष्ट्रीय गुणांकन रॅपिड बुद्धिबळ स्पर्धेत तृतीय क्रमांकासह रु. १० हजारांचे पारितोषिक मिळविले. तसेच लाटे रॅपिड आंतरराष्ट्रीय गुणांकन बुद्धिबळ स्पर्धेत सात पैकी सात गुणांची परिपूर्ण कमाई करत सरस बुचोल्झ गुणपद्धतीच्या आधारे विजेतेपदावर शिक्कामोर्तब केले व रु. १२ हजारांचे रोख पारितोषिक पटकावले. अहमदाबाद येथील रॅपिड बुद्धिबळ स्पर्धेतही त्याने पाचवा क्रमांक मिळवत रु. २१ हजारांचे रोख पारितोषिक जिंकले. या स्पर्धेत विविध राज्यातील ९८७ मातब्बर खेळाडूंनी सहभाग नोंदविला होता.
विरेश व मानसला आंतरराष्ट्रीय मार्गदर्शक व आंतरराष्ट्रीय पंच सुमुख गायकवाड, उदय वगरे तसेच भारतीय बुद्धिबळ महासंघाचे मुख्य प्रशिक्षक ग्रॅण्डमास्टर अभिजित कुंटे, चोला चेस यांचे मार्गदर्शन लाभत आहे. खेळाडूंनी मिळविलेल्या उल्लेखनीय यशाबद्दल सोलापुर डीस्ट्रीक्ट चेस असोसिएशनचे अध्यक्ष खा. धैर्यशील मोहिते पाटील, सोलापुर चेस अकॅडेमीचे अध्यक्ष महेश धाराशिवकर, अतुल कुलकर्णी, नामवंत उद्योजक रवींद्र जयवंत, नितीन काटकर, प्रशांत गांगजी, गोपाळ राठोड, संतोष पाटील, सौ. दिपाली पुजारी आदींनी अभिनंदन केले. तसेच महाराष्ट्र चेस असोसिएशनचे आधारस्तंभ अशोक भाऊ जैन, महाराष्ट्र चेस असोसिएशनचे अध्यक्ष परिणय फुके व सचिव निरंजन गोडबोले यांनी देखील कौतुक करत शुभेच्छा दिल्या.
