सुरेश रंगेनवार यांची राष्ट्रवादी काँग्रेसच्या किनवट विधानसभा कार्याध्यक्षपदी

किनवट : राष्ट्रवादी काँग्रेस पक्ष (अजितदादा पवार गट) यांच्या किनवट विधानसभा कार्याध्यक्षपदी ज्येष्ठ नेते सुरेश रंगेनवार यांची नुकत्याच संपन्न झालेल्या पक्षाच्या बैठकीत निवड करण्यात आली. पक्ष संघटनेत दीर्घकाळ केलेले कार्य, ग्रामीण भागातील दांडगा जनसंपर्क तसेच प्रभावी संघटन कौशल्याची दखल घेत पक्ष नेतृत्वाने त्यांच्यावर ही महत्त्वाची जबाबदारी सोपविली आहे. ही निवड आमदार प्रताप पाटील चिखलीकर यांच्या हस्ते जाहीर करण्यात आली. यावेळी जिल्हाध्यक्ष बाळासाहेब रावणगावकर, माजी आमदार सुभाष साबणे, माजी जिल्हा परिषद सदस्य गोजेगावकर, युवा नेते सचिन नाईक, विधानसभा प्रमुख वैजनाथ करपुडे पाटील यांच्यासह पक्षाचे अनेक पदाधिकारी, कार्यकर्ते व मान्यवर उपस्थित होते. सुरेश रंगेनवार यांनी यापूर्वी संयुक्त राष्ट्रवादी काँग्रेस पक्षाचे किनवट तालुका अध्यक्ष म्हणून यशस्वीपणे काम पाहिले आहे. त्यांच्या नेतृत्वाखाली पक्ष संघटना ग्रामीण भागात अधिक मजबूत झाली होती. सामान्य कार्यकर्त्यांशी सतत संपर्क ठेवत त्यांनी पक्ष वाढीसाठी सातत्याने प्रयत्न केले आहेत. त्यामुळे जिल्ह्यातील ग्रामीण भागात त्यांची स्वतंत्र ओळख निर्माण झाली आहे. राजकीय क्षेत्रात शांत, संयमी आणि संघटनात्मक कामावर भर देणारे नेतृत्व म्हणून सुरेश रंगेनवार यांच्याकडे पाहिले जाते. विविध सामाजिक व जनहिताच्या प्रश्नांवर त्यांनी सातत्याने भूमिका घेत सर्वसामान्य नागरिकांशी आपले नाते दृढ केले आहे. पक्षाच्या विचारधारेचा प्रचार आणि तळागाळातील कार्यकर्त्यांना एकत्रित करण्याचे काम त्यांनी प्रभावीपणे केले आहे. त्यांच्या निवडीमुळे किनवट विधानसभा राष्ट्रवादी काँग्रेस पक्षाला नवसंजीवनी मिळणार असून, आगामी स्थानिक स्वराज्य संस्था व इतर निवडणुकांच्या पार्श्वभूमीवर पक्ष संघटना अधिक बळकट होईल, असा विश्वास कार्यकर्त्यांकडून व्यक्त करण्यात येत आहे. निवडीनंतर सुरेश रंगेनवार यांनी पक्ष नेतृत्वाचे आभार मानत, “पक्षाने माझ्यावर टाकलेला विश्वास सार्थ ठरविण्यासाठी मी पूर्ण ताकदीने काम करणार असून, ग्रामीण भागातील सर्वसामान्य कार्यकर्त्यांना सोबत घेऊन पक्ष संघटना अधिक मजबूत करण्यासाठी प्रयत्नशील राहणार आहे,” अशी प्रतिक्रिया व्यक्त केली.