बार्शी – साहित्य क्षेत्रात सातत्याने दर्जेदार लेखन करणाऱ्या ज्येष्ठ साहित्यिका सुमन शिवानंद चंद्रशेखर यांनी तितिक्षा इंटरनॅशनल, पुणे यांच्यावतीने प्रदान करण्यात येणाऱ्या तितिक्षा आंतरराष्ट्रीय ग्रंथ पुरस्कारांची हॅटट्रिक साधत उल्लेखनीय कामगिरी केली आहे.
सुमन चंद्रशेखर यांना कादंबरी, ललित लेखसंग्रह आणि कवितासंग्रहासाठी एकाच वेळी तीन प्रतिष्ठित आंतरराष्ट्रीय पुरस्कार मिळाले आहेत.
तितिक्षा भावार्थसेवा अंतर्गत आयोजित करण्यात आलेला तितिक्षा आंतरराष्ट्रीय ग्रंथ पुरस्कार सोहळा कोल्हापूर येथे पार पडला. या सोहळ्यात सुमन चंद्रशेखर यांच्या तीन वेगवेगळ्या साहित्यकृतींना आंतरराष्ट्रीय स्तरावरील सन्मान प्राप्त झाला.
त्यामध्ये, “मायेची पाखर” या कादंबरीसाठी तितिक्षा आंतरराष्ट्रीय ग्रंथ पुरस्कार – सर्वोत्कृष्ट कादंबरी पुरस्कार, “आठवणींचा दरवळ” या पुस्तकासाठी तितिक्षा आंतरराष्ट्रीय ग्रंथ पुरस्कार – सर्वोत्कृष्ट ललित लेखसंग्रह पुरस्कार, “परिमळ” या पुस्तकासाठी तितिक्षा आंतरराष्ट्रीय ग्रंथ पुरस्कार – सर्वोत्कृष्ट कवितासंग्रह पुरस्कार अशा तीन मानाच्या पुरस्कारांचा समावेश आहे.
या पुरस्कार सोहळ्याच्या अध्यक्षस्थानी राष्ट्रपती पदक विजेते पर्यावरण तज्ज्ञ ॲड. तुषार शिवशरण हे होते. तसेच माजी आमदार जयश्री जाधव, लोककलावंत व अभिनेते राजेश खर्डे-वेसावकर, नाट्य अभिनेत्री शमा वैद्य, अभिनेत्री वैशाली राजशेखर, चित्रा साठे, जयमाला इनामदार तसेच शंकर अंदानी यांच्यासह विविध क्षेत्रातील मान्यवरांची उपस्थिती होती.
