पुणे – वेगवेगळ्या उपक्रमांची जणु प्रयोगशाळाच ठरलेल्या सहकारनगर भागातील अरण्येश्वर प्रभात शाखेचं मैदान शुक्रवारी उत्साहाने फुललं होतं.फुटबॉल वर्ल्डकप स्पर्धाच्या निमित्ताने या शाखेत होणा-या ‘फुटबॉल पर्वा’चा शुभारंभ तिथं होणार होता.
उद्घाटनाच्या प्रदर्शनीय सामन्यासाठी कार्यवाह संघ आणि मुख्यशिक्षक संघ सज्ज होते.निळे आणि पिवळे टी शर्ट घातलेले स्वयंसेवक मैदानात उतरण्यास आतूर होते.
सर्व खेळाडू व्हेटरन गटातले म्हणजे ६५ वर्षांच्या पुढचे उत्साहाने सळसळणारे ‘तरुण’ होते. या सराव पर्वाचं उद्घाटन पत्रकार, फुटबॉलचे माजी राष्ट्रीय खेळाडू आणि ‘व्हिवा फुटबॉल’ या मासिकाचे संपादक आशीष पेंडसे आणि ज्येष्ठ क्रीडा पत्रकार संजीव शाळगावकर यांच्या हस्ते झाले.
सध्याच्या युध्दाच्या स्थितीत फुटबॉलमुळे संघर्षाची तीव्रता कमी होईल असे आशीष पेंडसे यावेळी बोलतांना म्हणाले.भारतात फुटबॉल अधिक खेळला जावा यासाठी शालेय स्तरापासून फुटबॉल खेळला गेला पाहिजे असंही ते म्हणाले.
संजीव शाळगावकर यांनी फुटबॉलमधील पदलालित्य आणि राजकारणातल्या लाथाळ्या यांच्यातील साधर्म्य शोधत गंमतीदार वात्रटिका सादर केली.
प्रारंभी भगवान दातार यांनी पाहुण्यांचे स्वागत करतांना २०१० च्या जोहानसबर्ग इथल्या स्पर्धेच्या ‘वाका वाका’ या गाजलेल्या गीताचा उल्लेख केला. या गाण्यातल्या ‘ Your time to shine – Dont wait in line’ आणि ‘ ‘Today is your day, feel it – you paved the way believe it’ या ओळींचा त्यांनी उल्लेख केला.
मनातला उत्साह खळाळता राहावा आणि जिंकण्याची ऊर्मी टिकून रहावी यासाठी आम्ही हे फुटबॉल पर्व आयोजित केले आहे असेही ते म्हणाले.
हा सराव १९ जुलै पर्यत रोज चालणार असून २० जुलै रोजी या दोन्ही संघात अंतिम सामना होणार आहे. हा सराव सहकारनगर येथील अरण्येश्वर शाखेच्या मैदानावर रोज सकाळी ७.१५ ते ८.१५ या वेळात होईल. कार्यवाह नितीन करंबेळकर आणि मुख्यशिक्षक अमित आपटे यांच्या नेतृत्वाखाली स्वयंसेवकांनी ४० दिवसांच्या या सरावाचे आव्हान स्वीकारले आहे.
ज्यांना फुटबॉलमध्ये रस आहे त्या कोणालाही या महोत्सवात सहभागी होता येईल. अधिक माहितीसाठी
भगवान दातार 9881065892 यांच्याशी संपर्क साधावा
