बार्शी – शहरात भररस्त्यात महिलांच्या गळ्यातील दागिने हिसकावून नेण्याच्या घटना पुन्हा एकदा समोर येऊ लागल्या असून, ऐनापुर मारुती मंदिर परिसरात एका महिलेच्या गळ्यातील सुमारे ७० हजार रुपये किमतीचे सोन्याचे मिनी गंठण अज्ञात चोरट्यांनी लंपास केल्याची घटना घडली आहे.
याबाबत मिळालेल्या माहितीनुसार, शुक्रवार दि. १२ जून रोजी फिर्यादी महिला आपल्या आई व मुलीसह घरगुती साहित्य खरेदीसाठी पायी जात असताना ही घटना घडली. संध्याकाळी ७.३४ च्या सुमारास त्या ऐनापुर मारुती मंदिर परिसरात पोहोचल्या असता, मागून दुचाकीवर आलेल्या दोन अज्ञात व्यक्तींनी त्यांच्या गळ्यातील सोन्याचे मिनी गंठण जोरात हिसकावून घेतले आणि क्षणार्धात घटनास्थळावरुन पसार झाले.
अचानक घडलेल्या या प्रकारामुळे महिला घाबरून गेल्या असून त्यांनी आरडाओरडा केला. या झटापटीत त्यांच्या गळ्याला किरकोळ दुखापतही झाली. घटनेनंतर परिसरात आणि रस्त्याच्या बाजूला शोधाशोध करण्यात आली, मात्र चोरीस गेलेले दागिने अथवा आरोपींबाबत कोणतीही माहिती मिळू शकली नाही.
चोरीस गेलेल्या दागिन्यामध्ये अंदाजे २० ग्रॅम वजनाचे सोन्याचे मिनी गंठण असल्याचे फिर्यादीने पोलिसांना दिलेल्या तक्रारीत नमूद केले आहे.
घटनेची माहिती मिळताच बार्शी शहर पोलिसांनी अज्ञात दोन चोरट्यांविरुद्ध गुन्हा दाखल केला असून परिसरातील सीसीटीव्ही फुटेजची तपासणी, तसेच आरोपींचा शोध घेण्याचे काम सुरु केले आहे.
शहरात वाढत्या साखळी चोरीच्या घटनांमुळे नागरिकांमध्ये भीतीचे वातावरण निर्माण झाले असून, पोलिसांनी अशा गुन्ह्यांवर कठोर कारवाई करून आरोपींना तातडीने जेरबंद करावे, अशी मागणी नागरिकांकडून होत आहे.
