अकलूज – सोलापूर ग्रामीण महासंघ जिल्हा संघटनेचे जिल्हाध्यक्ष विजय मंडलिक यांच्या अध्यक्षतेखाली सांगोला तालुक्यातील रास्त भाव धान्य दुकानदारांची विविध अडीअडचणी व प्रलंबित प्रश्नांबाबत बैठक संपन्न झाली.
सांगोला पुरवठा विभागाचे अधिकारी रविकिरण शेटे यांच्या उपस्थितीत झालेल्या या बैठकीत दुकानदारांनी आपल्या विविध समस्या मांडल्या. या समस्या सोडविण्यासाठी जिल्हा संघटना जिल्हा पातळीपासून मंत्रालय स्तरापर्यंत पाठपुरावा करीत असल्याचे विजय मंडलिक यांनी सांगितले.
सांगोला तालुक्यातील रास्त भाव धान्य दुकानदार संघटनेच्या वतीने आयोजित करण्यात आलेल्या या बैठकीमध्ये तालुक्यातील रेशन दुकानदारांच्या अनेक दिवसांपासून प्रलंबित असलेल्या प्रश्नांवर सविस्तर चर्चा करण्यात आली. विशेषतः रेशन कार्डधारकांसाठी उपलब्ध असलेल्या इष्टांकाचा प्रश्न गंभीर असल्याचे दुकानदारांनी निदर्शनास आणून दिले.
सांगोला तालुक्यात सध्या रेशन कार्डधारकांसाठी पुरेसा इष्टांक शिल्लक नसल्याने अनेक पात्र, गोरगरीब आणि गरजू लाभार्थी धान्यापासून वंचित राहत असल्याचे दुकानदारांनी सांगितले. तसेच एखादा रेशन कार्डधारक मयत झाल्यानंतर किंवा कुटुंबातील मुलीचे लग्न झाल्यानंतर संबंधित इष्टांक कमी होतो; मात्र त्याजागी नवीन पात्र लाभार्थ्यांसाठी तो इष्टांक पुन्हा उपलब्ध करून दिला जात नसल्याची समस्या दुकानदारांनी मांडली.
याशिवाय सन २०२२ मध्ये चलनाद्वारे दुकानदारांनी भरलेली रोख रक्कम अद्याप मिळालेली नसल्याचा मुद्दाही बैठकीत उपस्थित करण्यात आला. ही रक्कम दुकानदारांची हक्काची असून ती लवकरात लवकर मिळावी, अशी मागणी करण्यात आली. धान्य वितरणाचे मार्जिनही नियमितपणे आणि दर महिन्याला मिळावे, अशी मागणी दुकानदारांनी केली.
यावेळी जिल्हाध्यक्ष विजय मंडलिक यांनी दुकानदारांच्या समस्या गांभीर्याने ऐकून घेत त्यावर संघटनेच्या माध्यमातून प्रभावी पाठपुरावा करण्याचे आश्वासन दिले. ज्या-ज्या दुकानदारांचा जेवढा इष्टांक कमी झाला आहे, तेवढा इष्टांक संबंधित दुकानदारांना पुन्हा उपलब्ध करून देण्यासाठी व्यवस्था करण्यात येईल, असे त्यांनी स्पष्ट केले.
सन २०२२ मध्ये चलनाद्वारे करण्यात आलेल्या रोख भरण्याच्या रकमेबाबत महासंघ जिल्हा संघटना जिल्हा पातळीपासून मंत्रालयापर्यंत सातत्याने पाठपुरावा करीत आहे. त्यामुळे दुकानदारांची हक्काची रक्कम लवकरच मिळवून देण्यासाठी प्रयत्न सुरू असल्याचे मंडलिक यांनी सांगितले.
मार्जिनच्या प्रश्नावरही संघटना सातत्याने पाठपुरावा करीत असल्याचे त्यांनी स्पष्ट केले. जिल्हा कार्यालयापासून मंत्रालयातील संबंधित वित्तीय कार्यालयापर्यंत पाठपुरावा करून रास्त भाव धान्य दुकानदारांना त्यांचे प्रलंबित मार्जिन मिळवून देण्यासाठी संघटना प्रयत्नशील आहे. यापुढे धान्य दुकानदारांना दर महिन्याला नियमितपणे मार्जिन मिळावे, यासाठीही शासन स्तरावर पाठपुरावा करण्यात येईल, असे मंडलिक यांनी सांगितले.
“तालुक्यातील कोणत्याही दुकानदाराच्या दुकानासंदर्भात वैयक्तिक अडचण किंवा प्रश्न असल्यास माझ्याशी थेट संपर्क साधावा. संबंधित अडचण सोडविण्यासाठी संघटनेच्या माध्यमातून निश्चितपणे प्रयत्न करण्यात येतील,” असे आश्वासनही विजय मंडलिक यांनी दिले.
दरम्यान, बैठकीच्या वेळी सांगोला तालुका रेशन दुकानदार संघटनेच्या वतीने तालुकाध्यक्ष भगवान इंगोले यांच्या हस्ते महासंघ जिल्हा संघटनेचे जिल्हाध्यक्ष विजय मंडलिक, सांगोला पुरवठा विभागाचे पुरवठा निरीक्षण अधिकारी रविकिरण शेटे, सांगोला पुरवठा निरीक्षक अधिकारी श्रीमती जाधव, मंगळवेढा तालुकाध्यक्ष महादेव माळी आणि पंढरपूर तालुक्याचे उपाध्यक्ष महावीर वाकसे यांचा सत्कार करण्यात आला.
या बैठकीस सांगोला तालुकाध्यक्ष भगवान इंगोले, शहराध्यक्ष चांडोले, सुनील माळी, मिलिंद रेडेकर, अरुण जाधव, अक्षय मिले यांच्यासह सांगोला पुरवठा विभागातील कर्मचारी तसेच सांगोला तालुक्यातील रास्त भाव धान्य दुकानदार मोठ्या संख्येने उपस्थित होते.
रेशन दुकानदारांच्या विविध प्रलंबित प्रश्नांवर प्रशासन आणि संघटनेच्या माध्यमातून तोडगा काढण्यासाठी प्रयत्न करण्याचा निर्धार या बैठकीत व्यक्त करण्यात आला.
