पंढरपूर – गणपती बाप्पा मोरया, मंगलमुर्ती मोरयाच्या गजरात शहरातील घरगुती गणपतीं बरोबरच विविध सार्वजनिक मंडळाच्या गणेशाच्या मुर्तींची सोमवारी (ता.१४) मोठ्या उत्साहात व भक्तीमय वातावरणात प्राणप्रतिष्ठा करण्यात आली. पंढरपूर शहर व तालुक्यातील ४२१ सार्वजनिक गणेश मंडळांनी पोलिसांकडे नोंदणी करून श्रींची प्रतिष्ठापना केली आहे. दरम्यान उत्सवाचा राजा समजल्या जाणाऱ्या या गणेशोत्सवास आजपासून सुरुवात झालेली आहे. त्यामुळे येथुन पुढे अकरा दिवस शहरात सार्वजनिक मंडळांकडून विविध कार्यक्रमांचे आयोजन करण्यात आलेले आहे.
दरम्यान गणेशचतुर्थी निमित्त सोमवारी सकाळ पासूनच येथील भादुले चौक, कुंभारगल्ली, स्टेशन रस्ता, इंदिरागांधी भाजी मंडई, नाथचौक परिसर या भागातून गणेशाच्यामुर्ती खरेदीसाठी नागरिकांची तसेच शहरातील विविध सार्वजनिक मंडळाच्या कार्यकर्त्यांची गर्दी झालेली होती. घरगुती गणेशमुर्तींची प्रतिष्ठापना दुपार पर्यंत करण्यात येत होती. त्यामुळे बाजारपेठेत घरातील वडीलधाऱ्या मंडळीं बरोबरच पारंपारिक वेशभुषेत महिला तसेच बच्चेकंपनी देखील उत्साहात गणेशमुर्तीची खरेदी करताना दिसत होते. या वेळी लहानमुलांनी गणपती बाप्पा मोरया अशी अक्षरे लिहिलेल्या केशरी रंगाच्या रिबिन्स कपाळाभोवती गुंडाळल्याचे दिसत होते. विविध शाळांमधील विद्यार्थी देखील आपल्या शिक्षकांसमवेत मोठ्या उत्साहात आपआपल्या शाळांचे गणवेश परिधान करुन गणेशमुर्ती शाळेकडे नेताना दिसत होते.
शहरातील अनेक मंडळांनी यावर्षी खास पेण, पुणे, नगर, सांगली आणि कोल्हापूर येथून गणेशाच्या मुर्ती आणलेल्या दिसत आहेत. गणेशनगर, मनिषानगर, इसबावी, कोर्टी रस्ता, लिंकरोड, टाकळीरोड, सांगोलारस्ता, वाखरी रस्ता, मंगळवेढा रस्ता आदी ठिकाणांसह उपनगरातील बऱ्याच सार्वजनिक गणेशोत्सव मंडळांचे कार्यकर्ते सायंकाळी पाच ते सहा वाजे पर्यंत गणेशमुर्तीची वाजतगाजत मिरवणूक काढून आपआपल्या मंडळामध्ये गणेशमुर्तीची विधीवत पुजा करुन प्राणप्रतिष्ठापना करीत होते. मात्र शहरातील मोठ्या सार्वजनिक मंडळाच्या गणेशमुर्तींची रात्री नऊ, साडेनऊ वाजे पर्यंत प्रतिष्ठापना करण्यात येत होती.
घरगुती तसेच सार्वजनिक मंडळातील गणेशाच्या मुर्तीच्या आरासासाठी लागणारे विविध प्रकारचे आरास साहित्यांचे स्टाँल्स देखील बाजारपेठेत दिसत होते. या स्टाँल्स वरुन खरेदीसाठी नागरिकांनी गर्दी केली होती. वेगवेगळ्या रंगाच्या रांगोळ्या, मखर, देवघर, गणेशाच्या पाठीमागे लावण्यासाठी लागणारी रंगीबेरंगी चक्रे, लाईटच्या माळा, रंगीबेरंगी दिवे, सोन्या, चांदीसारखे टोप,मोत्यांच्या माळा अशा विविध आकर्षक वस्तुंची देखील रेलचेल दिसत होती.
दरम्यान येथील भादुलेचौक, नाथचौक या परिसरात मोठ्या प्रमाणावर गणेशमुर्तींच्या विक्रीसाठी स्टाँल्स लावण्यात आलेले होते. या ठिकाणी नागरिकांची सकाळ पासून गणेशमुर्ती खरेदीसाठी गर्दी झाली होती. या भागात वाहतूकीची कोंडी होवू नये यासाठी शहर पोलिसांनी दुचाकी तसेच मोठ्या वाहनांना बंदी केली होती.त्यामुळे या भागात कुठेही फारशी वाहतूकीची कोंडी झाली नाही.
येथील उपविभागीय पोलिस अधिकाऱ्यांच्या मार्गदर्शनाखाली शहर, तालुका आणि ग्रामीण पोलिसांनी आपआपल्या कार्यक्षेत्रात सर्वत्र शांतते मध्ये आणि भक्तीमय वातावरणात तसेच डाँल्बीमुक्त गणेशोत्सव साजरा व्हावा यासाठी मंडळांतील पदाधिकाऱ्यांच्या बैठका घेऊन त्यांना मार्गदर्शन केलेले आहे. या बरोबरच शहर आणि तालुक्यात गणेशोत्सव शांततमध्ये साजरा होण्यासाठी मोठा पोलिस बंदोबस्त तैनात केल्याचे दिसत आहे.
————————–
चौकट : ( शहरात १४० सावर्जनिक गणेशोत्सव मंडळे )
पंढरपूर शहर व तालुक्यातील ४२१ सार्वजनिक गणेश मंडळांनी पोलिसांकडे नोंदणी करून श्रींची प्रतिष्ठापना केली आहे. विशेष म्हणजे तालुक्यातील ८ गावांमधुन ‘एक गाव, एक गणपती’ या संकल्पनेतून गणेशोत्सव साजरा केला जात आहे. या बरोबरच पंढरपूर शहरात १४० सार्वजनिक गणेश मंडळे गणेशोत्सव साजरा करत आहेत.
———————
चौकट : ( शहर व तालुक्यातील नोंदणी केलेल्या मंडळांची संख्या )
पंढरपूर शहर पोलीस स्टेशन अंतर्गत १४० सार्वजनिक गणेश मंडळे, पंढरपूर तालुका पोलीस स्टेशन अंतर्गत ५० गावात १०१ गणेश मंडळे तर आठ गावांमधून एक गाव एक गणपती संकल्पनेतून गणेशोत्सव साजरा होत आहे. या बरोबरच पंढरपूर ग्रामीण पोलीस स्टेशन अंतर्गत २४ गावात १३० गणेश मंडळांची नोंदणी झालेली असून जैनवाडी या एका गावात एक गाव एक गणपतीचे आयोजन करण्यात आलेले आहे. या बरोबरच करकंब पोलीस स्टेशन अंतर्गत २७ गावात ५० सार्वजनिक मंडळांनी परवानगी घेतली आहे.
