टीव्ही अभिनेत्री वैभवी उपाध्याय चं मंगळवारी रस्ते अपघातात निधन झालं. वैभवी उपाध्याय यांचे मंगळवारी सकाळी निधन झाले. हिमाचल प्रदेशमध्ये एका कार अपघातात वैभवीचा मृत्यू झाला. ती ३२ वर्षांची होती. चंदिगड येथील तिचे कुटुंबीय अभिनेत्रीचे पार्थिव मुंबईत आणत आहेत. वैभवीच्या पार्थिवावर बुधवारी सकाळी ११ वाजता मुंबईत अंत्यसंस्कार करण्यात येणार आहेत.
वैभवीने अनेक गाजलेल्या मालिकांमध्ये काम केलंं आहे. सीआयडी, अदालत आणि साराभाई वर्सेस साराभाई या तिच्या काही गाजलेल्या मालिका आहेत. यातही साराभाई मालिकेतील जास्मीन या भूमिकेने तिला विशेष ओळख मिळवून दिली.
मालिकेचे निर्माते जेडी मजेठीया यांनी अभिनेत्रीच्या निधनाच्या बातमीला दुजोरा दिला आहे. वैभवीच्या निधनाबद्दल बोलताना जेडी म्हणाले की, ‘मला खरच खूप मोठा धक्का बसला आहे. ती एक सुंदर व्यक्ती आणि अफलातून अभिनेत्री होती. आयुष्य किती अनिश्चित आहे हे पुन्हा एकदा दिसून आलं. जास्मीन या व्यक्तिरेखेने तिला ओळख मिळवून दिली.’
वैभवीने २०२० मध्ये प्रसिद्ध अभिनेत्री दीपिका पादुकोणसोबत ‘छपाक’ आणि ‘तिमिर’ (२०२३) या चित्रपटांमध्ये काम केलं होतं. गुजराती थिएटर जगतात अभिनेत्रीचं मोठं नाव होतं. टीव्ही शो ‘साराभाई वर्सेस साराभाई’ व्यतिरिक्त, वैभवीने ‘क्या कसूर है अमला का’ आणि ‘प्लीज फाइंड अटॅच्ड’ या डिजिटल सीरिजमध्येही काम केले.
