सोलापूर – राज्यातील शिक्षकांची थकीत बिले आणि प्रलंबित प्रशासकीय कामांवरून शिक्षक आमदार जयंत आसगावकर यांनी सोमवारी आक्रमक भूमिका घेत शिक्षण विभागाला धक्का दिला. पुणे येथील शिक्षण संचालक कार्यालयात दिवसभर ठाण मांडत त्यांनी थकीत बिलांचा सखोल आढावा घेतला आणि “संचालक स्तरावरील सर्व बिले आजच्या आज मार्गी लावा,” असे स्पष्ट निर्देश शिक्षण संचालक महेश पालकर यांना दिले. या धडक कारवाईमुळे शिक्षण खात्यात मोठी खळबळ उडाली आहे.
अर्थसंकल्पीय अधिवेशनात शिक्षण मंत्र्यांनी ३१ मार्चपूर्वी सर्व थकीत बिले देण्याचे आश्वासन दिले होते. मात्र, प्रत्यक्षात अनेक प्रकरणांमध्ये प्रशासनाकडून अपेक्षित गतीने काम होत नसल्याची बाब आमदार आसगावकर यांनी अधोरेखित केली. “अधिकारी ऐनवेळी बिलांमध्ये किरकोळ त्रुटी दाखवून ती प्रलंबित ठेवतात, ही अत्यंत गंभीर बाब आहे,” असे स्पष्ट मत त्यांनी व्यक्त केले.यावेळी त्यांनी हेतुपुरस्सर बिले अडवणाऱ्या अधिकाऱ्यांवर कठोर कारवाई करण्याची मागणीही ठामपणे मांडली. शिक्षकांच्या हक्काच्या देयकांमध्ये विलंब होणे अस्वीकार्य असल्याचे सांगत त्यांनी प्रशासनाला जबाबदारीची जाणीव करून दिली.
केवळ थकीत बिलांपुरते मर्यादित न राहता, आमदार आसगावकर यांनी शिक्षकांच्या इतर जिव्हाळ्याच्या प्रश्नांवरही लक्ष केंद्रित केले. शिक्षण उपसंचालक गणपतराव मोरे यांना प्रलंबित ‘शालार्थ आयडी’ तातडीने देण्याच्या सूचना त्यांनी दिल्या. या आयडीअभावी अनेक शिक्षकांना वेतन व इतर शासकीय सुविधा मिळण्यात अडथळे येत असल्याचे त्यांनी निदर्शनास आणून दिले.
तसेच, कोल्हापूर जिल्ह्यातील शिक्षकांना भेडसावणाऱ्या भविष्य निर्वाह निधी (पीएफ) बिलांच्या समस्येवरही त्यांनी थेट हस्तक्षेप केला. आमदार आसगावकर यांच्या सूचनेनंतर शिक्षण संचालक महेश पालकर यांनी कोल्हापूर वेतन पथक अधीक्षकांशी भ्रमणध्वनीवरून संपर्क साधत पीएफ बिले तातडीने मंजूर करण्याचे निर्देश दिले.या सर्व घडामोडींमुळे शिक्षकांच्या प्रलंबित प्रश्नांबाबत प्रशासनावर दबाव निर्माण झाला असून, आगामी काळात या प्रश्नांच्या निवारणाला गती मिळेल, अशी अपेक्षा व्यक्त केली जात आहे. शिक्षकांच्या हक्काच्या देयकांसाठी आमदार आसगावकर यांनी घेतलेला आक्रमक पवित्रा हा शिक्षण विभागासाठी इशारा मानला जात आहे.
शिक्षकांचे प्रश्न ‘ऑन द स्पॉट’ निकाली या बैठकीवेळी पुणे आणि कोल्हापूर विभागातून मोठ्या संख्येने शिक्षक बांधव उपस्थित होते. शिक्षकांनी आपले वैयक्तिक आणि सामूहिक प्रश्न आमदार जयंत आसगावकर यांच्यासमोर मांडले. यावेळी त्यांनी संचालक, उपसंचालक आणि शिक्षणाधिकारी यांच्याशी थेट संवाद साधून अनेक तांत्रिक प्रश्न जागेवरच निकाली लावले.
आमदार जयंत आसगावकर यांच्या या ‘ॲक्शन मोड’मुळे अनेक महिन्यांपासून रखडलेल्या फायलींना गती मिळाली असून, ३१ मार्चच्या अखेरीस शिक्षकांना मोठा दिलासा मिळाला आहे. या बैठकीत झालेल्या सकारात्मक चर्चेमुळे शिक्षक संघटनांनी समाधान व्यक्त केले आहे.
