सोलापूर : शहराच्या बहुप्रतिक्षित २४x७ पाणीपुरवठा वितरण योजनेला मुख्यमंत्री देवेंद्र फडणवीस यांनी मोठी गती दिली आहे. विधानभवनातील कॅबिनेट हॉलमध्ये झालेल्या उच्चस्तरीय बैठकीत सुमारे १,५०० कोटींच्या या महत्त्वाकांक्षी प्रकल्पाबाबत डीपीआर, निविदा प्रक्रिया, शासकीय जागा हस्तांतरण आणि निधी उभारणीसंदर्भात महत्त्वपूर्ण निर्णय घेण्यात आले.
बैठकीत महापालिकेच्या प्रशासकीय मान्यतेनंतर जागतिक बँकेच्या MUWREP योजनेअंतर्गत तत्त्वतः मंजूर झालेल्या प्रकल्पाची अंमलबजावणी जलदगतीने करण्याचे निर्देश देण्यात आले. ३० ऑगस्ट २०२६ पर्यंत डीपीआर आणि निविदा प्रक्रिया पूर्ण करून ३० नोव्हेंबर २०२६ पर्यंत काम मंजुरीसाठी सादर करण्याचे आदेश संबंधित विभागांना देण्यात आले.प्रकल्पाचा दीर्घकालीन खर्च कमी करण्यासाठी डीपीआरमध्ये सौरऊर्जा आणि बॅटरी स्टोरेजचा समावेश करण्याचे निर्देशही मुख्यमंत्र्यांनी दिले. तसेच केंद्र शासनाच्या अर्बन चॅलेंज फंड अंतर्गत प्रकल्पासाठी पात्रता असल्याने, प्रकल्प खर्चाच्या २५ टक्क्यांपर्यंत अनुदान मिळविण्यासाठी तातडीने प्रस्ताव सादर करण्याचा निर्णय घेण्यात आला.
प्रकल्पासाठी आवश्यक असलेल्या कृषी, जलसंपदा, सामाजिक न्याय, उच्च व तंत्रशिक्षण तसेच वैद्यकीय शिक्षण विभागांच्या शासकीय जमिनी उपलब्ध करून देण्यासही बैठकीत मंजुरी देण्यात आली. जिल्हाधिकाऱ्यांना संबंधित जागांचा तात्पुरता ताबा घेऊन त्या सोलापूर महानगरपालिकेकडे हस्तांतरित करण्यासाठी तातडीने कार्यवाही करण्याचे निर्देश देण्यात आले.
याशिवाय, प्रकल्पाच्या अंमलबजावणीत कोणत्याही प्रकारचा विलंब झाल्यास त्याचा थेट अहवाल मुख्यमंत्री कार्यालयाकडे सादर करण्याचे आदेशही देण्यात आले आहेत.या योजनेअंतर्गत अंत्रोळीकर नगर, शेळगी, दहिताणे, कासबे सोलापूर–हिप्परगा मार्ग, विद्यापीठ परिसर आणि पोदार शाळेजवळ उंच पाण्याच्या टाक्या उभारण्याचे नियोजन करण्यात आले असून, त्यासाठी आवश्यक शासकीय जागा उपलब्ध करून देण्याची प्रक्रिया तातडीने पूर्ण केली जाणार आहे.
या बैठकीस सार्वजनिक बांधकाम मंत्री शिवेंद्रसिंहराजे भोसले, पालकमंत्री जयकुमार गोरे, आमदार देवेंद्र कोठे, स्थायी समिती अध्यक्षा रंजिता चाकोते, मुख्यमंत्री यांचे मुख्य आर्थिक सल्लागार तथा MITRAचे मुख्य कार्यकारी अधिकारी प्रवीण परदेशी, नगरविकास विभागाचे वरिष्ठ अधिकारी तसेच महापालिका आयुक्त डॉ. सचिन ओम्बासे उपस्थित होते.
मुख्यमंत्र्यांच्या निर्देशांमुळे सोलापूरच्या दीर्घकालीन पाणीपुरवठा व्यवस्थेला नवी गती मिळाली असून, शहराला आधुनिक, सक्षम आणि अखंडित २४x७ पाणीपुरवठा व्यवस्था उपलब्ध करून देण्याच्या दिशेने हा महत्त्वाचा टप्पा मानला जात आहे.
—-
