सोलापूर – गांजाच्या झाडांची लागवड करून गांजा विक्री करणारा सराईत गुन्हेगार शहर गुन्हे शाखेकडुन अटक करून एकूण ०४ लाख ३९ हजार ९०० रूपये किंमतीचा २१.४३९ किलो ग्रॅम वजनाचा गांजा जप्त करण्यात आला आहे.
दि. ३०/०३/२०२६ रोजी वरिष्ठ पोलीस निरीक्षक अरविंद माने सोबत पोलीस उप-निरीक्षक मुकेश गायकवाड व त्यांचे तपास पथक पोलीस आयुक्तालय हद्दीमध्ये गस्त करीत असताना थोबडे वस्ती, जुना देगांव नाका येथील रोडच्या डाव्या बाजूस आतमध्ये झाडाखाली एक इसम संशयीतरीत्या प्लास्टीक पिशवी घेवून बसल्याचे दिसून आला. पिशवीतील पुड्या विक्री करत असल्याचे आढळुन आला. या ठिकाणी गांजा विक्री करत असल्याचे प्रथमदर्शनी संशय आल्याने उचित कायदेशीर प्रक्रीयेअंतर्गत त्यास ताब्यात घेवून चौकशी केली असता त्याने त्याचे नाव रजाक गफुर शेख वय ४९ वर्षे व्यवसाय मजुरी रा. घर नं. ०५ थोबडे वस्ती, जुना देगांव नाका, सोलापूर असे असल्याचे सांगितले. त्याच्या कब्जातील प्लास्टीक पिशवीबाबत विचारपूस करुन प्लास्टिक पिशवीची पाहणी केली असता त्यामध्ये गांजा हा अंमली पदार्थ मिळून आला. तसेच अधिक चौकशीमध्ये त्याने त्याच्या राहते घराच्या कंम्पाऊंडमध्ये व घरासमोरील परिसरामध्ये एकुण ५९ गांजाच्या झाडांची लागवड केली असल्याचे आढळून आले.
त्यानंतर एनडीपीएस अॅक्ट अंतर्गत रजाक गफुर शेख याच्या कब्जातील प्लास्टीक पिशवीमधील २२७ ग्रॅम गांजा तसेच त्याने लागवड केलेली ५९ गांजाची झाडे उपटून त्यांचे वजन २१.२१२ किलो ग्रॅम असा एकूण २१.४३९ किलो ग्रॅम गांजा जप्त करण्यात आला. रजाक गफुर शेख याने विक्री करीता स्वतःच्या ताब्यात गांजा बाळगल्याचे तसेच विक्री करण्याच्या उद्देशाने गांजाच्या झाडांची अवैधरित्या लागवड केल्याचे निष्पन्न झाल्याने त्याच्या विरुध्द फौजदार चावडी पोलीस ठाणे, येथे गुन्हा दाखल करण्यात आला आहे.
सदरची कामगिरी एम. राज कुमार, पोलीस आयुक्त, डॉ. अश्वीनी पाटील, पोलीस उप आयुक्त (गुन्हे/वि.शा.), राजन माने, सहा. पोलीस आयुक्त (गुन्हे), अरविंद माने, वरिष्ठ पोलीस निरीक्षक गुन्हे शाखा यांचे मार्गदर्शनाखाली पो.उप.नि. मुकेश गायकवाड, पोलीस अंमलदार नंदराम गायकवाड, वाजीद पटेल, योगेश बर्डे, संजय साळुंखे, भारत पाटील, अजिंक्य माने, सिध्दाराम देशमुख, महेश रोकडे, शैलेश बुगड, अभिजीत धायगुडे, महिला पोलीस अंमलदार सुमित्रा बारबोले, अर्चना स्वामी, चालक बाळु काळे यांनी केली आहे.
