मोडनिंब – महाराष्ट्र नवनिर्माण सेनेच्या कुर्डूवाडी–पंढरपूर बससेवा मोडनिंब मार्गे सुरू करणे वतीने तसेच बसस्थानकातील मूलभूत सुविधा वाढविण्याची मागणी करण्यात आली आहे. याबाबत सोलापूर विभागीय नियंत्रण अधिकारी महाराष्ट्र राज्य परिवहन महामंडळ सोलापूर यांना मनसे जिल्हाध्यक्ष प्रशांत गिड्डे यांनी निवेदन देण्यात आले.
जिल्हाध्यक्ष गिड्डे यांनी दिलेल्या निवेदनात नमूद केले आहे की, कुर्डूवाडी–शेटफळ–मोडनिंब बसस्थानक–पालखीमार्ग–कल्पतरू हॉटेल मार्गे पंढरपूर तसेच परतीच्या मार्गावर किमान दिवसातून तीन फेऱ्या सुरू करण्यात याव्यात. तसेच मराठवाड्यातून पंढरपूरकडे जाणाऱ्या काही बस मोडनिंब मार्गे वळवाव्यात.याशिवाय पटवर्धन कुरवली (ता. पंढरपूर) ते सोलापूर दरम्यान पूर्वी सुरू असलेली ‘डबागाडी’ पुन्हा सुरू करावी, अशी मागणी करण्यात आली आहे.
सध्या कान्हापुरी (करोळे) ते सोलापूर बससेवा सुरू असून त्याच धर्तीवर ही सेवा पुन्हा सुरू करावी, असे निवेदनात म्हटले आहे.मोडनिंब बसस्थानकात सकाळी ६ ते रात्री १० या वेळेत दोन कंट्रोलर आणि रात्री १० ते सकाळी ६ या वेळेत एक वॉचमन कायमस्वरूपी नेमावा. तसेच बोअरवेलचे पाणी उपलब्ध करून देणे, पुरुष व महिलांसाठी स्वतंत्र नवे शौचालय बांधणे आणि बसस्टँडच्या पाठीमागील भिंत पाडून बस थांबण्यासाठी अतिरिक्त जागेची व्यवस्था करावी, अशा मागण्या करण्यात आल्या आहेत.
सदर मागण्या लवकरात लवकर पूर्ण न झाल्यास महाराष्ट्र नवनिर्माण सेनेतर्फे टप्प्याटप्याने आंदोलन छेडण्यात येईल, असा इशाराही मनसे जिलाध्यक्ष प्रशांत गिड्डे यांच्या निवेदनातून देण्यात आला आहे.
चालकांची मनमानी; मोडणीमं बस स्थानकात न घेता वरूनच फेऱ्या
मोडनिंब बसस्थानकात अनेकदा एस.टी. चालक बस आत न घेता थेट वरूनच पुढे जात असल्याची तक्रार करण्यात आली आहे. यामुळे प्रवाशांना मोठा त्रास सहन करावा लागत असून ज्येष्ठ नागरिक, महिला व विद्यार्थ्यांची गैरसोय होत आहे. संबंधित चालकांवर कारवाई करावी.काही चालक मनमानी करत बस स्थानकात न थांबता थेट पुढे जात असल्याचा आरोप करण्यात आला. सर्व बस स्थानकात नियमितपणे घेण्याचे आदेश द्यावेत, अशी मागणी मनसेच्या वतीने करण्यात आली आहे.
